Keńes otyrysynda jastardyń túrli sanattary boiynsha ózekti máseleler kóterildi. Atap aitqanda «Serpin-2050» memlekettik baǵdarlamasynyń mańyzdylyǵy talqylandy. Atalmysh baǵdarlama aiasynda tiisti óńirlerdegi JOO-nyń mamandaryn shaqyrtyp, oblystyń shalǵai aýyldarynda mobildi aqparattandyrý jumystaryn júrgizýge qatysty birqatar usynystar aityldy.
Jalpy «Serpin – 2050» memlekettik baǵdarlamasy 2014 jyldan bastap iske asyp keledi. Degenmen baǵdarlama óz deńgeiinde nátije kórsetpeýde. Osy másele jaily kózqarasyn bildirgen B.Tájibaev aqparattyq-túsindirý jumystaryna jastardyń da aralasqany jón dep dep sanaidy.
– Ishki-kóshi qon taqyrybyn jii qozǵaimyn. Sebebi halyqtyń turmys-jaǵdaiyn kóterýge, jastardyń bilim alýyna jaǵdai jasalǵan «Eńbek» jáne «Serpin» memlekettik baǵdarlamalaryn utymdy paidalanǵan jón. Biraq nasihat jumystarynyń tómen bolýynyń áserinen oqý granttary igerilmei, basqa óńirlerdiń jastary múmkindikten aiyrylyp otyr. Óitkeni jyl saiyn bólinetin granttardyń sany 5000-nyń ústinde. Mysaly 2020 jyly 5107 grand bólinse, 979 stýdent oqýǵa qabyldanǵan. Bul tym tómen kórsetkish. Baǵdarlamada turaqty jumyspen qamtý jaǵy da qarastyrylǵan. Osy aqparattardy bizdiń oblystyń turǵyndaryna jetkizý jumystaryna belsene arlasyp, aýyl-aimaqtaǵy mektep bitirýshilerdi, olardyń ata-analaryn qulaqtandyrsaq baǵdarlama oń nátijesin kórsetedi. Eń bastysy jastar arasynda jumyssyzdyq problemasy da azaiady, – dedi ol.
Jiyn barysynda Qoǵamdyq keńestiń jańa tóraiymy Dinara Egamberdieva stýdentterdiń oqý jaǵdaiyn qadaǵalaý maqsatynda aldaǵy ýaqytta monitoringtik top qurylyp, oqý oryndary men jataqhanalarǵa tekserý jumystary júrgiziletinin aitty. Sondai-aq óńirde «Jasyl el» jobasy aiasynda maýsymdyq jumysqa bólingen 1150 orynǵa NEET sanatyndaǵy jáne ózge de jumyssyz jastardy shaqyrý kózdelip otyrǵanyn habarlady.
Kelesi keńes otyrysy mamyr aiyna josparlandy. Oǵan deiin jastar tarapynan túsken usynystar men suraqtar toptastyrylyp, kún tártibine engizilmek.
