كەڭەس وتىرىسىندا جاستاردىڭ ءتۇرلى ساناتتارى بويىنشا وزەكتى ماسەلەلەر كوتەرىلدى. اتاپ ايتقاندا «سەرپىن-2050» مەملەكەتتىك باعدارلاماسىنىڭ ماڭىزدىلىعى تالقىلاندى. اتالمىش باعدارلاما اياسىندا ءتيىستى وڭىرلەردەگى جوو-نىڭ ماماندارىن شاقىرتىپ، وبلىستىڭ شالعاي اۋىلدارىندا ءموبيلدى اقپاراتتاندىرۋ جۇمىستارىن جۇرگىزۋگە قاتىستى ءبىرقاتار ۇسىنىستار ايتىلدى.
جالپى «سەرپىن – 2050» مەملەكەتتىك باعدارلاماسى 2014 جىلدان باستاپ ىسكە اسىپ كەلەدى. دەگەنمەن باعدارلاما ءوز دەڭگەيىندە ناتيجە كورسەتپەۋدە. وسى ماسەلە جايلى كوزقاراسىن بىلدىرگەن ب.تاجىبايەۆ ءاقپاراتتىق-تۇسىندىرۋ جۇمىستارىنا جاستاردىڭ دا ارالاسقانى ءجون دەپ دەپ سانايدى.
– ىشكى-كوشى قون تاقىرىبىن ءجيى قوزعايمىن. سەبەبى حالىقتىڭ تۇرمىس-جاعدايىن كوتەرۋگە، جاستاردىڭ ءبىلىم الۋىنا جاعداي جاسالعان «ەڭبەك» جانە «سەرپىن» مەملەكەتتىك باعدارلامالارىن ۇتىمدى پايدالانعان ءجون. ءبىراق ناسيحات جۇمىستارىنىڭ تومەن بولۋىنىڭ اسەرىنەن وقۋ گرانتتارى يگەرىلمەي، باسقا وڭىرلەردىڭ جاستارى مۇمكىندىكتەن ايىرىلىپ وتىر. ويتكەنى جىل سايىن بولىنەتىن گرانتتاردىڭ سانى 5000-نىڭ ۇستىندە. مىسالى 2020 جىلى 5107 گراند بولىنسە، 979 ستۋدەنت وقۋعا قابىلدانعان. بۇل تىم تومەن كورسەتكىش. باعدارلامادا تۇراقتى جۇمىسپەن قامتۋ جاعى دا قاراستىرىلعان. وسى اقپاراتتاردى ءبىزدىڭ وبلىستىڭ تۇرعىندارىنا جەتكىزۋ جۇمىستارىنا بەلسەنە ارلاسىپ، اۋىل-ايماقتاعى مەكتەپ بىتىرۋشىلەردى، ولاردىڭ اتا-انالارىن قۇلاقتاندىرساق باعدارلاما وڭ ناتيجەسىن كورسەتەدى. ەڭ باستىسى جاستار اراسىندا جۇمىسسىزدىق پروبلەماسى دا ازايادى، – دەدى ول.
وسى ماسەلەنى جالعاعان سوزاق اۋداندىق جاستار ورتالىعىنىڭ ديرەكتورى ج.تولەپبەرگەن ءوڭىرىمىزدىڭ شالعاي اۋىلدارىندا ءموبيلدى اقپاراتتاندىرۋ جۇمىستارىن جۇرگىزۋدى ۇسىندى. سونىمەن قاتار تالقىعا سالىنعان تاعى ءبىر ماسەلە جاستاردى باسپانامەن قامتۋ جايى. تۇركىستان قالالىق ءماسليحات دەپۋتاتى ن.جۇسىپبايەۆ پەن تۇلكىباس اۋداندىق «Jas Otan» جق-نىڭ ءتوراعاسى ي.جولباسحانوۆ جالدامالى تۇرعىن ءۇي ماسەلەسى ءتيىستى اتقارۋشى ورگاندارمەن بىرلەسە شەشىلسە دەيدى. سەبەبى ولاردىڭ ايتۋىنشا تۇركىستان وبلىسى رەسپۋبليكا بويىنشا جاستار كوپ شوعىرلانعان ايماق بولعاندىقتان ولاردى جۇمىسپەن جانە باسپانامەن قامتۋ، جالپى جاعداي جاساۋ ماڭىزدى.
جيىن بارىسىندا قوعامدىق كەڭەستىڭ جاڭا ءتورايىمى دينارا ەگامبەردييەۆا ستۋدەنتتەردىڭ وقۋ جاعدايىن قاداعالاۋ ماقساتىندا الداعى ۋاقىتتا مونيتورينگتىك توپ قۇرىلىپ، وقۋ ورىندارى مەن جاتاقحانالارعا تەكسەرۋ جۇمىستارى جۇرگىزىلەتىنىن ايتتى. سونداي-اق وڭىردە «جاسىل ەل» جوباسى اياسىندا ماۋسىمدىق جۇمىسقا بولىنگەن 1150 ورىنعا NEET ساناتىنداعى جانە وزگە دە جۇمىسسىز جاستاردى شاقىرۋ كوزدەلىپ وتىرعانىن حابارلادى.
كەلەسى كەڭەس وتىرىسى مامىر ايىنا جوسپارلاندى. وعان دەيىن جاستار تاراپىنان تۇسكەن ۇسىنىستار مەن سۇراقتار توپتاستىرىلىپ، كۇن تارتىبىنە ەنگىزىلمەك.
