1980 jylǵy Máskeýde ótken jazǵy Olimpiada oiyndarynyń kúmis júldegeri, qazaqstandyq boksshy, eks-depýtat Serik Qonaqbaev óz atyna Astana halyqaralyq qarjy ortalyǵy alańynda holdingtik kompaniiany tirkedi, dep habarlaidy Dalanews.kz.
Bul týraly aqparatpen Finmentor Telegram arnasynyń avtory Arman Bataev bólisti.
"Forbes Kazakhstan tizimine jańadan engen Serik Qonaqbaev AHQO-da tirkelip, KazCore Energy Ltd. kompaniiasynyń quryltaishysy atandy. Onyń quryltaishylary arasynda Serik Qonaqbaevqa tiesili Triple A Holding Ltd. kompaniiasynyń da aty atalady. Eki kompaniianyń da negizgi qyzmet salasy – holdingtik qyzmet. Sondai-aq ekeýin de Serik Qonaqbaevtyń uly, kásipker Amanat Qonaqbaev basqarady. Forbes málimetteri boiynsha, Serik Qonaqbaev "K-Global Invest" JShS arqyly "SSM Oil" JShS-nyń 60 % úlesine ie ári aktsioneri. Bul kompaniia Qyzylorda oblysynda kómirsýtekti shikizat mineraldaryn barlaý jáne óndirýmen ainalysady. Bul baǵyttaǵy jobalar qoldanysqa engizý kezeńinde bolyp tabylady. Sondai-aq Qonaqbaevtyń Mańǵystaý oblysyndaǵy Shalva ken ornynda barlaý jáne óndiris jumystaryn júrgizý boiynsha 2023 jyly kelisimshartqa qol jetkizgen "ARK Petroleum" JShS-da da úlesi bar", delingen jazbada.
Buǵan deiin kásipker Timýr Týrlov Grýziianyń bank naryǵyna bet buryp, osy elde Fridom Bank Qazaqstannyń "enshilesin" ashpaq niette ekenin jazǵanbyz.
