Karantin jáne tótenshe jaǵdai kezinde «Sergek» júiesi kúsheitilgen rejimde jumys isteýde. Tekserý júrgizýshilerge qatysty jasalady.
«Sergek-patrýl» bazasyna avtokólik toqtaǵan kezde politseiler júrgizýshi men kóliktiń derekterin: JSN, kóliktiń memlekettik nómiri jáne júrgizýshiniń naqty turǵylyqty jeri men jumys ornyn engizedi.
Negizsiz qalaǵa shyqqan tártip buzýshylar alǵashynda eskertý alady.
Ekinshi márte tártip buzǵan jaǵdaida 10 AEK aiyppuldan 15 táýlikke deiin ákimshilik qamaýǵa alynýy múmkin.
«Qaita tekserý kezinde, eger aqparattyq bazanyń málimetterine sáikes, azyq-túlik pen dári-dármekter alýdan basqa maqsatta, marshrýtty negizsiz buzǵany anyqtalsa, júrgizýshi QR ÁQBK 476 baby («Tótenshe jaǵdai rejimin buzý») boiynsha ákimshilik jaýapkershilikke tartylady», –delingen Memkomissiianyń shuǵyl shtaby taratqan habarlamada.
Qazirgi ýaqytta bazada TJ kezindegi quqyq buzýshylyqtar eseptelýde. Kún saiyn «jumys – úi» qaǵidaty boiynsha avtokólik júrgizýshileriniń derekteri engiziledi. TJ rejimi men karantin tártibin buzǵany úshin aiyppuldar búgingi kúni ózekti.
Nur-Sultan qalasy boiynsha barlyǵy 13 000 «Sergek» kamerasy bar. Ol kúnine 12 mln-nan astam oqiǵany óńdeýge múmkindik beredi.
