كارانتين جانە توتەنشە جاعداي كەزىندە «سەرگەك» جۇيەسى كۇشەيتىلگەن رەجيمدە جۇمىس ىستەۋدە. تەكسەرۋ جۇرگىزۋشىلەرگە قاتىستى جاسالادى.
«سەرگەك-پاترۋل» بازاسىنا اۆتوكولىك توقتاعان كەزدە پوليسەيلەر جۇرگىزۋشى مەن كولىكتىڭ دەرەكتەرىن: جسن، كولىكتىڭ مەملەكەتتىك ءنومىرى جانە جۇرگىزۋشىنىڭ ناقتى تۇرعىلىقتى جەرى مەن جۇمىس ورنىن ەنگىزەدى.
نەگىزسىز قالاعا شىققان ءتارتىپ بۇزۋشىلار العاشىندا ەسكەرتۋ الادى.
ەكىنشى مارتە ءتارتىپ بۇزعان جاعدايدا 10 اەك ايىپپۇلدان 15 تاۋلىككە دەيىن اكىمشىلىك قاماۋعا الىنۋى مۇمكىن.
«قايتا تەكسەرۋ كەزىندە، ەگەر اقپاراتتىق بازانىڭ مالىمەتتەرىنە سايكەس، ازىق-تۇلىك پەن دارى-دارمەكتەر الۋدان باسقا ماقساتتا، مارشرۋتتى نەگىزسىز بۇزعانى انىقتالسا، جۇرگىزۋشى ق ر اقبك 476 بابى («توتەنشە جاعداي رەجيمىن بۇزۋ») بويىنشا اكىمشىلىك جاۋاپكەرشىلىككە تارتىلادى»، –دەلىنگەن مەمكوميسسيانىڭ شۇعىل شتابى تاراتقان حابارلامادا.
قازىرگى ۋاقىتتا بازادا تج كەزىندەگى قۇقىق بۇزۋشىلىقتار ەسەپتەلۋدە. كۇن سايىن «جۇمىس – ءۇي» قاعيداتى بويىنشا اۆتوكولىك جۇرگىزۋشىلەرىنىڭ دەرەكتەرى ەنگىزىلەدى. تج رەجيمى مەن كارانتين ءتارتىبىن بۇزعانى ءۇشىن ايىپپۇلدار بۇگىنگى كۇنى وزەكتى.
نۇر-سۇلتان قالاسى بويىنشا بارلىعى 13 000 «سەرگەك» كامەراسى بار. ول كۇنىنە 12 ملن-نان استام وقيعانى وڭدەۋگە مۇمكىندىك بەرەدى.
