Senator ustazdar eńbekaqysyn kóterýge shaqyrdy
Senatorlar №23 orta mektepte oqý úderisterimen tanysyp, ustazdarmen jáne oqýshylarmen áńgimelesti. Depýtattar oqý synyptarynda, sport zalynda jáne ashanada bolyp, oqý ornynyń jumystarymen tanysty. Erekshe oqytý talaptary bar balalarmen resýrstyq kabinetterdegi jumystar týraly habardar etildi. Psihologtar men muǵalimder damýy kesheýildegen balalardy oqytýdy uiymdastyrý týraly áńgimeledi.
Áleýmettik-mádeni damý jáne ǵylym komitetiniń tóraǵasy Birǵanym Áitimova mektep ujymymen kezdesý barysynda Qazaqstan Prezidenti N.Nazarbaevtyń «Bolashaqqa baǵdar: rýhani jańǵyrý» atty baǵdarlamalyq maqalasynda rýhani jańǵyrýdaǵy negizgi maqsattardyń biri retinde bilimniń mańyzy týraly aitqanyn eske saldy.
Sheteldik ozyq tájiribelerdi mysalǵa ala otyryp, B. Áitimova «Muǵalim bilim berý júiesinde basty tulǵaǵa ainalýy tiis», – dep atap ótti. Senator muǵalimderdi áleýmettik qoldaýdyń mańyzdylyǵyn aita kelip, 2018-2020 jyldarǵa arnalǵan respýblikalyq biýdjetten bilim berý salasynyń muqtajdaryn qarjylandyrý máselelerine toqtaldy. Depýtattyń pikirinshe, eń aldymen muǵalim eńbegine tólem deńgeiin kóterýmen qatar olarǵa morldyq turǵyda qoldaý kórsetý qajet. B. Áitimova atap ótkendei, eńbekke aqy tólemi men mektepterdi qamtamasyz etýdegi ózekti máseleler bilim berý júiesin qarjylandyrýdy jan basyna esepteý júiesine kóshirýge bailanysty sheshilýi tiis.
Senatorlar №23 orta mektepti búgingi kúnniń talaptaryna sáikestendirý úshin qosymsha ǵimarat qurylysy men materialdyq-tehnikalyq jaǵdaiyn jaqsartýǵa qarjy bólýge járdemdesý maqsatynda Astana qalasy ákiminiń orynbasary Ermek Amanshaevqa ótinish jasady.
Astana qalasyndaǵy fizika-matematika baǵytyndaǵy Nazarbaev ziiatkerlik mektebinde oqý úderisterin jańǵyrtý týraly áńgime odan ári jalǵasty. Depýtattar oqý ornynyń jumysymen tanysyp, arnaýly kabinetterde, kitaphanada jáne interaktivti oqý aimaqtarynda boldy. Ziiatkerlik mektebiniń ujymy ázirlegen,oqýdyń innovatsiialyq ádisterine negizdelgen oqý jáne ádistemelik ádebietter kórsetildi. Depýtattar qazirgi zamandaǵy tehnologiialardy engizý salasyndaǵy mekteptiń jetistikterine joǵary baǵa berdi.
Senator Serik Bekturǵanov kóshpeli otyrys barysynda sóilegen sózinde Bilim jáne ǵylym ministrliginiń basshylyǵyn muǵalimder men ata-analarǵa túsindirý jumystaryn qarqyndy júrgizýge shaqyrdy. Sonda oqýlyqtarǵa bailanysty bolǵan keleńsiz oqiǵalar sekildi qatelikter men jaǵymsyz jaǵdailardyń aldyn alýǵa múmkindik bolady. «Jetistikterdi jarnamalaýdan góri bilim berý salasyndaǵy jańalyqtardy túsindire otyryp, árqashan alda júrý kerek, áitpese, Nazarbaev ziiatkerlik mektepteri pedagogikalyq úzdik tájiribelerdiń jeke dara mekeni bolyp qala beredi» dedi depýtat.
Talqylaý barysynda balalardy úsh tilde oqytý, oqý jáne ádistemelik materialdardyń sapasy, oqýshylardyń saýattylyq mindetin arttyrý máseleleri de kóterildi.
