سەناتورلار №23 ورتا مەكتەپتە وقۋ ۇدەرىستەرىمەن تانىسىپ، ۇستازدارمەن جانە وقۋشىلارمەن اڭگىمەلەستى. دەپۋتاتتار وقۋ سىنىپتارىندا، سپورت زالىندا جانە اسحانادا بولىپ، وقۋ ورنىنىڭ جۇمىستارىمەن تانىستى. ەرەكشە وقىتۋ تالاپتارى بار بالالارمەن رەسۋرستىق كابينەتتەردەگى جۇمىستار تۋرالى حاباردار ەتىلدى. پسيحولوگتار مەن مۇعالىمدەر دامۋى كەشەۋىلدەگەن بالالاردى وقىتۋدى ۇيىمداستىرۋ تۋرالى اڭگىمەلەدى.
الەۋمەتتىك-مادەني دامۋ جانە عىلىم كوميتەتىنىڭ ءتوراعاسى ءبىرعانىم ءايتىموۆا مەكتەپ ۇجىمىمەن كەزدەسۋ بارىسىندا قازاقستان پرەزيدەنتى ن.نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا رۋحاني جاڭعىرۋداعى نەگىزگى ماقساتتاردىڭ ءبىرى رەتىندە ءبىلىمنىڭ ماڭىزى تۋرالى ايتقانىن ەسكە سالدى.
شەتەلدىك وزىق تاجىريبەلەردى مىسالعا الا وتىرىپ، ب. ءايتىموۆا «ءمۇعالىم ءبىلىم بەرۋ جۇيەسىندە باستى تۇلعاعا اينالۋى ءتيىس»، – دەپ اتاپ ءوتتى. سەناتور مۇعالىمدەردى الەۋمەتتىك قولداۋدىڭ ماڭىزدىلىعىن ايتا كەلىپ، 2018-2020 جىلدارعا ارنالعان رەسپۋبليكالىق بيۋدجەتتەن ءبىلىم بەرۋ سالاسىنىڭ مۇقتاجدارىن قارجىلاندىرۋ ماسەلەلەرىنە توقتالدى. دەپۋتاتتىڭ پىكىرىنشە، ەڭ الدىمەن ءمۇعالىم ەڭبەگىنە تولەم دەڭگەيىن كوتەرۋمەن قاتار ولارعا مورلدىق تۇرعىدا قولداۋ كورسەتۋ قاجەت. ب. ءايتىموۆا اتاپ وتكەندەي، ەڭبەككە اقى تولەمى مەن مەكتەپتەردى قامتاماسىز ەتۋدەگى وزەكتى ماسەلەلەر ءبىلىم بەرۋ جۇيەسىن قارجىلاندىرۋدى جان باسىنا ەسەپتەۋ جۇيەسىنە كوشىرۋگە بايلانىستى شەشىلۋى ءتيىس.
سەناتورلار №23 ورتا مەكتەپتى بۇگىنگى كۇننىڭ تالاپتارىنا سايكەستەندىرۋ ءۇشىن قوسىمشا عيمارات قۇرىلىسى مەن ماتەريالدىق-تەحنيكالىق جاعدايىن جاقسارتۋعا قارجى بولۋگە جاردەمدەسۋ ماقساتىندا استانا قالاسى اكىمىنىڭ ورىنباسارى ەرمەك امانشايەۆقا ءوتىنىش جاسادى.
استانا قالاسىنداعى فيزيكا-ماتەماتيكا باعىتىنداعى نازاربايەۆ زياتكەرلىك مەكتەبىندە وقۋ ۇدەرىستەرىن جاڭعىرتۋ تۋرالى اڭگىمە ودان ءارى جالعاستى. دەپۋتاتتار وقۋ ورنىنىڭ جۇمىسىمەن تانىسىپ، ارناۋلى كابينەتتەردە، كىتاپحانادا جانە ينتەراكتيۆتى وقۋ ايماقتارىندا بولدى. زياتكەرلىك مەكتەبىنىڭ ۇجىمى ازىرلەگەن،وقۋدىڭ يننوۆاسيالىق ادىستەرىنە نەگىزدەلگەن وقۋ جانە ادىستەمەلىك ادەبيەتتەر كورسەتىلدى. دەپۋتاتتار قازىرگى زامانداعى تەحنولوگيالاردى ەنگىزۋ سالاسىنداعى مەكتەپتىڭ جەتىستىكتەرىنە جوعارى باعا بەردى.
سەناتور سەرىك بەكتۇرعانوۆ كوشپەلى وتىرىس بارىسىندا سويلەگەن سوزىندە ءبىلىم جانە عىلىم مينيسترلىگىنىڭ باسشىلىعىن مۇعالىمدەر مەن اتا-انالارعا ءتۇسىندىرۋ جۇمىستارىن قارقىندى جۇرگىزۋگە شاقىردى. سوندا وقۋلىقتارعا بايلانىستى بولعان كەلەڭسىز وقيعالار سەكىلدى قاتەلىكتەر مەن جاعىمسىز جاعدايلاردىڭ الدىن الۋعا مۇمكىندىك بولادى. «جەتىستىكتەردى جارنامالاۋدان گورى ءبىلىم بەرۋ سالاسىنداعى جاڭالىقتاردى تۇسىندىرە وتىرىپ، ءارقاشان الدا ءجۇرۋ كەرەك، ايتپەسە، نازاربايەۆ زياتكەرلىك مەكتەپتەرى پەداگوگيكالىق ۇزدىك تاجىريبەلەردىڭ جەكە دارا مەكەنى بولىپ قالا بەرەدى» دەدى دەپۋتات.
تالقىلاۋ بارىسىندا بالالاردى ءۇش تىلدە وقىتۋ، وقۋ جانە ادىستەمەلىك ماتەريالداردىڭ ساپاسى، وقۋشىلاردىڭ ساۋاتتىلىق مىندەتىن ارتتىرۋ ماسەلەلەرى دە كوتەرىلدى.
