Senator elimizde bilim berý salasynda qomaqty qarjy bólingenimen ondaǵy keibir máseleler áli sheshimin tappaǵanyn atap ótti.
"Keiingi jyldary bilim salasyn damytýǵa, atap aitqanda, kompiýterler satyp alýǵa, interaktiv taqtalarǵa, mektepterdi internetke qosýǵa, elektron oqý júiesin engizýge kóptegen qarajat bólindi.
Talai ministr osy zalǵa kelip, orasan zor jumys atqarylǵany týraly uzyn-sonar baiandaýlaryna qaramastan pandemiiada bul salada qordalanǵan máselelerdiń áli kóp ekeni anyqtaldy.
Bul týraly el Prezidenti Qasym-Jomart Toqaev óz joldaýynda meilinshe ashyq, aiqyn aityp berdi. Ásirese, biryńǵai bilim berý platformasyn uiymdastyrý máselesi jóninde. Endi bilim salasyndaǵy júieli problemalar pandemiia jaǵdaiynda ǵana qalyptasqan joq. Ol jyldar boiy qordalandy", - dedi ol.
Onyń pikirinshe, búginde bul másele milliondaǵan ata-anany, ustazdar qaýymyn, qalyń jurtshylyqty alańdatyp otyr. Depýtat óz saýalynda atalǵan problemalardyń sebepteri men saldary, máselelerdi sheshý joldary anyq kórsetilgenin, olardy shartty túrle 4 topqa jikteýge bolatynyn aitty. Osyǵan bailanysty Qul-Muhammed úkimet basshysynan tómendegi suraqtarǵa jaýap berýdi surady.
"Birinshiden, Memleket basshysynyń biryńǵai bilim berý onlain platformasyn qurý týraly tapsyrmasy qandai merzimde iske asyrylady? Árbir múddeli memlekettik organdardyń, atap aitar bolsaq, bilim jáne ǵylym, densaýlyq saqtaý, tsifrlyq damý ministrlikteriniń jumysyn úilestirý men olardyń ózara is-qimyly naqty aiqyndaldy ma? Protsesti jyldamdatýǵa tehnikalyq múmkindikter bar ma? Biryńǵai bilim berý onlain platformasyn qurý úshin biýdjetten qosymsha shyǵyndar qarastyrylǵan ba?
Ekinshiden, qashyqtan oqytý sheńberinde azamattardyń tegin orta bilim alýyna konstitýtsiialyq kepildikteri qamtamasyz etilgen be? Qashyqtan oqytý barysynda keltirilgen qosymsha shyǵyndardy óteý sizderdiń jumys josparlaryńyzda bar ma?
Úshinshiden, uzaq merzimdi qashyqtan oqytý saldarynan bilim berý deńgeiiniń tómendeýimen bailanysty aldaǵy ýaqytta qandai sharalar atqarylý kózdelgen.
Tórtinshiden, ártúrli áleýmettik toptardaǵy bilim alýshylar arasyndaǵy bilim berý deńgeiiniń alshaqtyǵyn azaitý boiynsha úkimettiń jumys jospary qandai?", - dedi senator.
Muhtar Qul-Muhammed bilim berý máselesi halyq úshin óte mańyzdy ekenin atap ótti.
"Bul problemalardyń barlyǵy respýblikadaǵy árbir otbasyny alańdatyp otyr. Óitkeni, árbir otbasynda keminde 1-2 bala mektepke barady, ia bolmasa onyń jumysyn úiinde ata-anasymen birge atalary men ájeleri de qadaǵalap otyrady. Tipti, mekteptiń ózinde milliondaǵan bala bilim alyp jatyr. Sondyqtan biz bul problemany jalpyhalyqtyq, búkilulttyq probelamalar dep esepteimiz", - dedi depýtat.
