سەناتور ەلىمىزدە ءبىلىم بەرۋ سالاسىندا قوماقتى قارجى بولىنگەنىمەن ونداعى كەيبىر ماسەلەلەر ءالى شەشىمىن تاپپاعانىن اتاپ ءوتتى.
"كەيىنگى جىلدارى ءبىلىم سالاسىن دامىتۋعا، اتاپ ايتقاندا، كومپيۋتەرلەر ساتىپ الۋعا، ينتەراكتيۆ تاقتالارعا، مەكتەپتەردى ينتەرنەتكە قوسۋعا، ەلەكترون وقۋ جۇيەسىن ەنگىزۋگە كوپتەگەن قاراجات ءبولىندى.
تالاي مينيستر وسى زالعا كەلىپ، وراسان زور جۇمىس اتقارىلعانى تۋرالى ۇزىن-سونار بايانداۋلارىنا قاراماستان پاندەميادا بۇل سالادا قوردالانعان ماسەلەلەردىڭ ءالى كوپ ەكەنى انىقتالدى.
بۇل تۋرالى ەل پرەزيدەنتى قاسىم-جومارت توقايەۆ ءوز جولداۋىندا مەيلىنشە اشىق، ايقىن ايتىپ بەردى. اسىرەسە، ءبىرىڭعاي ءبىلىم بەرۋ پلاتفورماسىن ۇيىمداستىرۋ ماسەلەسى جونىندە. ەندى ءبىلىم سالاسىنداعى جۇيەلى پروبلەمالار پاندەميا جاعدايىندا عانا قالىپتاسقان جوق. ول جىلدار بويى قوردالاندى"، - دەدى ول.
ونىڭ پىكىرىنشە، بۇگىندە بۇل ماسەلە ميلليونداعان اتا-انانى، ۇستازدار قاۋىمىن، قالىڭ جۇرتشىلىقتى الاڭداتىپ وتىر. دەپۋتات ءوز ساۋالىندا اتالعان پروبلەمالاردىڭ سەبەپتەرى مەن سالدارى، ماسەلەلەردى شەشۋ جولدارى انىق كورسەتىلگەنىن، ولاردى شارتتى تۇرلە 4 توپقا جىكتەۋگە بولاتىنىن ايتتى. وسىعان بايلانىستى قۇل-مۇحاممەد ۇكىمەت باسشىسىنان تومەندەگى سۇراقتارعا جاۋاپ بەرۋدى سۇرادى.
"بىرىنشىدەن، مەملەكەت باسشىسىنىڭ ءبىرىڭعاي ءبىلىم بەرۋ ونلاين پلاتفورماسىن قۇرۋ تۋرالى تاپسىرماسى قانداي مەرزىمدە ىسكە اسىرىلادى؟ ءاربىر مۇددەلى مەملەكەتتىك ورگانداردىڭ، اتاپ ايتار بولساق، ءبىلىم جانە عىلىم، دەنساۋلىق ساقتاۋ، سيفرلىق دامۋ مينيسترلىكتەرىنىڭ جۇمىسىن ۇيلەستىرۋ مەن ولاردىڭ ءوزارا ءىس-قيمىلى ناقتى ايقىندالدى ما؟ پروسەستى جىلدامداتۋعا تەحنيكالىق مۇمكىندىكتەر بار ما؟ ءبىرىڭعاي ءبىلىم بەرۋ ونلاين پلاتفورماسىن قۇرۋ ءۇشىن بيۋدجەتتەن قوسىمشا شىعىندار قاراستىرىلعان با؟
ەكىنشىدەن، قاشىقتان وقىتۋ شەڭبەرىندە ازاماتتاردىڭ تەگىن ورتا ءبىلىم الۋىنا كونستيتۋسيالىق كەپىلدىكتەرى قامتاماسىز ەتىلگەن بە؟ قاشىقتان وقىتۋ بارىسىندا كەلتىرىلگەن قوسىمشا شىعىنداردى وتەۋ سىزدەردىڭ جۇمىس جوسپارلارىڭىزدا بار ما؟
ۇشىنشىدەن، ۇزاق مەرزىمدى قاشىقتان وقىتۋ سالدارىنان ءبىلىم بەرۋ دەڭگەيىنىڭ تومەندەۋىمەن بايلانىستى الداعى ۋاقىتتا قانداي شارالار اتقارىلۋ كوزدەلگەن.
تورتىنشىدەن، ءارتۇرلى الەۋمەتتىك توپتارداعى ءبىلىم الۋشىلار اراسىنداعى ءبىلىم بەرۋ دەڭگەيىنىڭ الشاقتىعىن ازايتۋ بويىنشا ۇكىمەتتىڭ جۇمىس جوسپارى قانداي؟"، - دەدى سەناتور.
مۇحتار قۇل-مۇحاممەد ءبىلىم بەرۋ ماسەلەسى حالىق ءۇشىن وتە ماڭىزدى ەكەنىن اتاپ ءوتتى.
"بۇل پروبلەمالاردىڭ بارلىعى رەسپۋبليكاداعى ءاربىر وتباسىنى الاڭداتىپ وتىر. ويتكەنى، ءاربىر وتباسىندا كەمىندە 1-2 بالا مەكتەپكە بارادى، يا بولماسا ونىڭ جۇمىسىن ۇيىندە اتا-اناسىمەن بىرگە اتالارى مەن اجەلەرى دە قاداعالاپ وتىرادى. ءتىپتى، مەكتەپتىڭ وزىندە ميلليونداعان بالا ءبىلىم الىپ جاتىر. سوندىقتان ءبىز بۇل پروبلەمانى جالپىحالىقتىق، بۇكىلۇلتتىق پروبەلامالار دەپ ەسەپتەيمىز"، - دەدى دەپۋتات.
