Keshe Senatta kóshi-qon máselesine arnalǵan jiynda depýtattar Qytai azamattaryna turmysqa shyqqan qazaq qyzdaryna qatysty másele kóterdi, dep habarlaidy Sputnik.
– Ótkende Almaty oblysynyń eldi mekenderin aralaǵanda mynaý Erenqabyrǵany jailaǵan elden kelip, bizdiń qazaq qyzdaryna úilenip, azamattyq alyp jatyr degen másele óte ótkir qoiyldy, qatty aityldy. Osyndai jolmen qansha sheteldik azamattyq aldy? Osynyń tizimi men naqty sany bar ma? – dep surady senator Nurtóre Júsip.
Ishki ister ministriniń birinshi orynbasary Marat Qojaevtyń aitýynsha, ondai sheteldikter bar. Sebebi, qazaq qyzyna úilengennen keiin azamattyq alýǵa tyiym salatyn zań joq.
– Bizde tyiym salatyn zań joq. Endi bizdiń qyzdarymyz turmysqa shyǵa ma, joq pa, ol jeke bastyń sheshimi ǵoi. Bizdiń esebimiz boiynsha, shetinen barlyǵy shyǵyp jatqan joq. Iá, kei kezde kezdesedi, – dedi Qojaev.
Onyń sózine qaraǵanda, qazaq qyzyna úilengen sheteldik bes jyldan keiin Qazaqstan azamattyǵyn ala alady. Onyń týystaryna da sondai múmkindik beriledi.
– Ol jaqyn týystaryna ǵana qatysty. Iá, belgili bir ýaqyttan keiin ondai múmkindik beriledi, – dep atap kórsetti Qojaev. Osy kezde senatorlar arasynda «Masqara! Bul óte qaýipti ǵoi» degen sózder estildi. Al ishki ister ministriniń birinshi orynbasary Qazaqstan azamttyǵyn alǵan sheteldikterdiń naqty sanyn jazbasha túrde beretinin aitty. Sebebi, ol málimetterdi Ádilet ministrliginen alý qajet.
Osy oraida, senatorlar sheteldikterge Qazaqstan azamattyǵyn berý merzimin qaita qaraý qajettigin jetkizdi.
– Bizdiń azamattyǵymyzdy úsh jylda alý az ǵana ýaqyt qoi. Amerika, Ulybritaniia siiaqty elder 10-15 jylda ǵana beredi. Sonyń ózinde úlken eńbekpen, qara termen alyp jatady. Mysaly, men biletin Qazaqstan azamaty 11 jylda áreń aldy. Úsh jyl bolsyn, bes jyl bolsyn, ol tym az, – dedi senator Dana Nurjigit.
– Sony kóbeitse, qalai bolady eken? Mysaly, Birikken Arab Ámirlikterinde azamattyqty múldem bermeidi. Bul – úlken, kókeitesti másele. Bizdiń kórshimiz ǵoi. Sondyqtan abailaý kerek, zerdeleý kerek. Saiasi jaǵy da bar, – dedi senator Murat Baqtiiaruly.
Marat Qojaev sheteldikterge Qazaqstan azamatyǵyn berý merzimin uzartýǵa qatysty máseleniń zerdelenetinin jetkizdi.
