كەشە سەناتتا كٶشٸ-قون مەسەلەسٸنە ارنالعان جيىندا دەپۋتاتتار قىتاي ازاماتتارىنا تۇرمىسقا شىققان قازاق قىزدارىنا قاتىستى مەسەلە كٶتەردٸ, دەپ حابارلايدى Sputnik.
– ٶتكەندە الماتى وبلىسىنىڭ ەلدٸ مەكەندەرٸن ارالاعاندا مىناۋ ەرەنقابىرعانى جايلاعان ەلدەن كەلٸپ, بٸزدٸڭ قازاق قىزدارىنا ٷيلەنٸپ, ازاماتتىق الىپ جاتىر دەگەن مەسەلە ٶتە ٶتكٸر قويىلدى, قاتتى ايتىلدى. وسىنداي جولمەن قانشا شەتەلدٸك ازاماتتىق الدى? وسىنىڭ تٸزٸمٸ مەن ناقتى سانى بار ما? – دەپ سۇرادى سەناتور نۇرتٶرە جٷسٸپ.
ٸشكٸ ٸستەر مينيسترٸنٸڭ بٸرٸنشٸ ورىنباسارى مارات قوجاەۆتىڭ ايتۋىنشا, ونداي شەتەلدٸكتەر بار. سەبەبٸ, قازاق قىزىنا ٷيلەنگەننەن كەيٸن ازاماتتىق الۋعا تىيىم سالاتىن زاڭ جوق.
– بٸزدە تىيىم سالاتىن زاڭ جوق. ەندٸ بٸزدٸڭ قىزدارىمىز تۇرمىسقا شىعا ما, جوق پا, ول جەكە باستىڭ شەشٸمٸ عوي. بٸزدٸڭ ەسەبٸمٸز بويىنشا, شەتٸنەن بارلىعى شىعىپ جاتقان جوق. يە, كەي كەزدە كەزدەسەدٸ, – دەدٸ قوجاەۆ.
ونىڭ سٶزٸنە قاراعاندا, قازاق قىزىنا ٷيلەنگەن شەتەلدٸك بەس جىلدان كەيٸن قازاقستان ازاماتتىعىن الا الادى. ونىڭ تۋىستارىنا دا سونداي مٷمكٸندٸك بەرٸلەدٸ.
– ول جاقىن تۋىستارىنا عانا قاتىستى. يە, بەلگٸلٸ بٸر ۋاقىتتان كەيٸن ونداي مٷمكٸندٸك بەرٸلەدٸ, – دەپ اتاپ كٶرسەتتٸ قوجاەۆ. وسى كەزدە سەناتورلار اراسىندا «ماسقارا! بۇل ٶتە قاۋٸپتٸ عوي» دەگەن سٶزدەر ەستٸلدٸ. ال ٸشكٸ ٸستەر مينيسترٸنٸڭ بٸرٸنشٸ ورىنباسارى قازاقستان ازامتتىعىن العان شەتەلدٸكتەردٸڭ ناقتى سانىن جازباشا تٷردە بەرەتٸنٸن ايتتى. سەبەبٸ, ول مەلٸمەتتەردٸ ەدٸلەت مينيسترلٸگٸنەن الۋ قاجەت.
وسى ورايدا, سەناتورلار شەتەلدٸكتەرگە قازاقستان ازاماتتىعىن بەرۋ مەرزٸمٸن قايتا قاراۋ قاجەتتٸگٸن جەتكٸزدٸ.
– بٸزدٸڭ ازاماتتىعىمىزدى ٷش جىلدا الۋ از عانا ۋاقىت قوي. امەريكا, ۇلىبريتانييا سيياقتى ەلدەر 10-15 جىلدا عانا بەرەدٸ. سونىڭ ٶزٸندە ٷلكەن ەڭبەكپەن, قارا تەرمەن الىپ جاتادى. مىسالى, مەن بٸلەتٸن قازاقستان ازاماتى 11 جىلدا ەرەڭ الدى. ٷش جىل بولسىن, بەس جىل بولسىن, ول تىم از, – دەدٸ سەناتور دانا نۇرجٸگٸت.
– سونى كٶبەيتسە, قالاي بولادى ەكەن? مىسالى, بٸرٸككەن اراب ەمٸرلٸكتەرٸندە ازاماتتىقتى مٷلدەم بەرمەيدٸ. بۇل – ٷلكەن, كٶكەيتەستٸ مەسەلە. بٸزدٸڭ كٶرشٸمٸز عوي. سوندىقتان ابايلاۋ كەرەك, زەردەلەۋ كەرەك. ساياسي جاعى دا بار, – دەدٸ سەناتور مۇرات باقتييارۇلى.
مارات قوجاەۆ شەتەلدٸكتەرگە قازاقستان ازاماتىعىن بەرۋ مەرزٸمٸن ۇزارتۋعا قاتىستى مەسەلەنٸڭ زەردەلەنەتٸنٸن جەتكٸزدٸ.
