Qazirgi tańda qazaq tilinde bilim beretin Baiqońyr qalasyndaǵy 5 mektepte búgingi kúni 5 236 bala bilim alsa, reseilik 7 mektepte 4049 bala bilim alady, onyń 1 508-i, iaǵni 37% Qazaqstan azamattarynyń balalary.
Baiqońyrda qazir Reseige qarasty 7 mektep bar. Depýtat olardyń syiymdylyǵy tolyq qamtylmaǵanyn jetkizdi. Murat Baqtiiarulynyń aitýynsha, qala turǵyndarymen kezdesý barysynda orys tilinde oqytatyn qazaqstandyq mektepke suranystyń joǵary ekenin eskerip, osy 7 mekteptiń birin memleket menshigine ótkizýdi surady.
– Bul jaǵdai, reseilik mektepte oqityn balalardyń mektep bitirgennen soń UBT-ǵa qatysýyna jáne qazaqstandyq joǵary oqý oryndaryna túsýine kóp kedergi keltirýde. Sebebi emtihannyń mindetti pánderi – Qazaqstan tarihy, qazaq tili, qazaq ádebieti ol mektepterde oqytylmaidy, – dedi senator.
Osylaisha Baiqońyrdyń ortalyq aýdandarynda Resei Federatsiiasynyń menshigindegi, syiymdylyǵy tolyq paidalanylmai turǵan 13 balabaqsha bar eken. Depýtat halyqtyń birneshe balabaqshany memlekettik iýrisdiktsiiaǵa ótkizý talaby oryndy dep sanaidy.
– Olar Qazaqstan aýmaǵynda týyp-óskenimen, óz jerinde turyp, meniń Otanym – Resei, meniń astanam – Máskeý dep, Reseidiń arǵy-bergi tarihyn, tili men ádebietin oqyp, árine reseilik patriotizm rýhynda tárbielenedi. Aita ótýimiz kerek, biz jerimizdi jalǵa bergenimizben, sol jerde turyp jatqan halqymyzdy jalǵa bergen joqpyz ǵoi, – dedi Murat Baqtiiaruly.
Senator Úkimet basshysynan Baiqońyr qalasy turǵyndarynyń bilim berý salasyna qatysty osy túitkildi máselesin basty nazarǵa alyp, oń sheshilýine yqpal etýin surady.
