Qazaqstan Senaty AQSh pen Qazaqstan úkimetteri arasyndaǵy kelisimdi ratifikatsiialap, Almaty qalasynda AQSh-tyń jańa bas konsýldyǵyn salý úshin jer telimin uzaq merzimge jalǵa berý jónindegi qujatty bekitti, dep habarlaidy Dalanews.kz.
Kelisimge sáikes, Amerika Qurama Shtattary 70 myń sharshy metrden astam jer telimin 49 jylǵa jalǵa alady. Bul úshin AQSh tarapy bir rettik tólem retinde 25,3 million dollardy kelisim kúshine engen soń 30 kún ishinde tóleidi.
AQSh bul aýmaqta konsýldyq ǵimarattan bólek, Saýda ministrligi, Esirtkimen kúres agenttigi jáne Kommertsiialyq qyzmet ókildikterin ornalastyrýdy josparlap otyr. Barlyq qurylys, qyzmet kórsetý, jóndeý jáne kommýnaldyq shyǵyndar tolyqtai AQSh tarapynan qarjylandyrylady. Sonymen qatar, kelisimge sai, olar salyq pen kedendik bajdardan bosatylady.
Zań jobasyn usynǵan mamandardyń aitýynsha, bolashaqta bul konsýldyq Ortalyq Aziiadaǵy eń aýqymdy viza ortalyǵyna ainalyp, Qazaqstannyń halyqaralyq arenadaǵy bedelin nyǵaityp, investitsiialyq tartymdylyǵyn arttyrady. Sondai-aq, bul joba jańa jumys oryndarynyń ashylýyna jáne qyzmet kórsetý men biznes salalarynyń damýyna jol ashýy múmkin.
Syrtqy ister ministriniń birinshi orynbasary Aqan Rahmetýllinniń málimetinshe, qazirgi tańda Almatyda AQSh konsýldyǵy eki bólek nysandy jaldap otyr. Jańa keshen daiyn bolǵan soń, barlyq qyzmetkerler sol jerge kóshiriledi.
"Shtat sany kóbeie me, joq pa – ázirge belgisiz. Biraq jańa ǵimarat keń ári tolyqqandy infraqurylymmen jabdyqtalady. Sondyqtan belgili bir dárejede keńeitý josparlanýy múmkin. Bul másele boiynsha AQSh tarapymen naqty kelissózder júrgiziledi", – dedi Rahmetýllin Senat otyrysynan keiin.
Prezident kelisimge qol qoiǵannan keiin, Almaty ákimdigi men AQSh bas konsýldyǵy arasynda qosymsha qujattar rásimdelip, qurylys jumystary bastalady. Bul jobany amerikalyq qurylys kompaniiasy júzege asyrady dep kútilýde.
