Semeıden elimizdiń iri qalalaryna qatynaıtyn áýe reısteriniń sany artyp keledi. 23 qyrkúıekten bastap «Qaraǵandy – Semeı – Qaraǵandy» baǵytynda syıymdylyǵy 50 oryndyq «Bombardier CRJ200» ushaǵy jolaýshylardy tasymaldaı bastady, dep habarlaıdy Dalanews.kz
Sýbsıdıalanǵan reısti «SCAT» áýe kompanıasy júzege asyrady. Jolaýshylar aptasyna 2 ret – seısenbi jáne beısenbi kúnderi qatynaıtyn bolady. Bılet baǵasy – 15 000 teńge.
Jańa baǵyttyń ashylýy turǵyndarǵa qolaıly ári qoljetimdi baǵada saparlaýǵa múmkindik beredi.
Qazirgi ýaqytta Semeı qalasynan «Semeı – Almaty», «Semeı – Astana», «Semeı – Úrjar», «Semeı – Qaraǵandy» baǵyttary boıynsha áýe reısteri oryndalýda. Atalǵan reısterdi «FlyArystan», «Ońtústik aspany», «SCAT» áýe kompanıalary júzege asyryp keledi.
Aıta keteıik, respýblıkalyq búdjetten sýbsıdıalanatyn jańa baǵyt Qazaqstan Respýblıkasy Kólik mınıstrliginiń Azamattyq avıasıa komıtetiniń jáne Abaı oblysy ákimdiginiń qoldaýymen ashylyp otyr.
