Semeidegi oblystyq jedel járdem aýrýhanasynda patsientterdi qoldaý qyzmeti ashyldy. Is-sharaǵa oblys ákimi Berik Ýáli, Densaýlyq saqtaý ministri Aqmaral Álnazarova qatysty, dep habarlaidy Dalanews.kz
Byltyr jedel meditsinalyq járdem aýrýhanasynyń qabyldaý bólimine 39 815 patsient kelip, olardyń 15 442-si aýrýhanaǵa jatqyzylǵan. Emdelýshilerdiń 70 paiyzy qabyldaý bólimi men travmatologiialyq pýnktke jii júginedi. Osyǵan orai aýrýhana basshylyǵy patsientterdi qoldaý qyzmetin tórtinshi qabattan birinshi qabatqa kóshirdi. Endi naýqastar esh kedergisiz ortalyq qyzmetine júgine alady. Bul shaǵymdar berý protsesin jeńildetip, kútý ýaqytyn azaitýǵa jáne patsientterdiń quqyqtaryn qorǵaýǵa jaýapty mamandardyń qoljetimdiligin arttyrady. Ashylý saltanatynda sóz alǵan Densaýlyq saqtaý ministri Aqmaral Álnazarova patsientterdi qoldaý ortalyǵy daýly jaǵdailardy jedel sheshýge jáne dárigerlermen ózara is-qimyl jasaýǵa kómektesetinin atap ótti.
«Prezidenttiń tapsyrmasy aiasynda Semei qalasynda dárigerlerdi kásibi saqtandyrý júiesin engizdik. Sonymen qatar, patsientterdiń máseleleri tez arada sheshilsin degen nietpen osyndai ortalyqtardy ashyp jatyrmyz. Qazirgi tańda respýblika boiynsha 6 myńnan astam adam osy qyzmette jumys atqarýda. Bul ortalyq Abai oblysynyń turǵyndaryna septigin tigizedi degen senimdemin»,- dedi Densaýlyq saqtaý ministri.
Patsientterdi qoldaý qyzmetiniń negizgi mindeti - emdelýshiler men olardyń týystaryna aqparattyq jáne konsýltativtik kómek kórsetý, shaǵymdar men usynystardy qabyldap, jedel qarastyrý.
Ortalyqtyń ashylý saltanatynan keiin Densaýlyq saqtaý ministri Aqmaral Álnazarova Abai oblysynyń ákimi Berik Ýálimen birge oblystyq jedel járdem aýrýhanasynyń bólimshelerin aralap, jumysymen tanysty. Mekemeni aralaý barysynda ministr aimaq basshysyna jedel járdem aýrýhanasynyń múmkindigin keńeitý úshin Semei meditsina ýniversiteti aýmaǵynda neiroinsýlttyq bólimshesin ashý týraly usynys aitty.
Aimaq basshysy oblystyq jedel járdem aýrýhanasyna ákimdik tarapynan tiisti qoldaý bolatynyn atap ótti.
«Bul mekemeniń máselelerimen jaqsy tanyspyn. Ǵimarat qurylysy áýelde durys josparlanbaǵan. Drenaj júiesi de durys jobalanbaǵan. Jerasty sýynyń kóterilýine bailanysty aýrýhananyń jertólesine sý jaiylǵan. Bul máseleni sheshý úshin tiisti jobalyq-smetalyq qujattar daiyndalyp, memlekettik saraptamaǵa jiberildi. Qazirgi ýaqytta jedel járdem aýrýhanasynyń korpýstarynyń shatyry men qasbetterine kúrdeli jóndeý júrgizilýde. Buǵan oblystyq biýdjetten qarjy bólingen. Qurylys jumystary jeke baqylaýymda bolady», - dedi oblys ákimi.
