سەمەيدەگى وبلىستىق جەدەل جاردەم اۋرۋحاناسىندا پاسيەنتتەردى قولداۋ قىزمەتى اشىلدى. ءىس-شاراعا وبلىس اكىمى بەرىك ءۋالي، دەنساۋلىق ساقتاۋ ءمينيسترى اقمارال ءالنازاروۆا قاتىستى، دەپ حابارلايدى Dalanews.kz
بىلتىر جەدەل مەديسينالىق جاردەم اۋرۋحاناسىنىڭ قابىلداۋ بولىمىنە 39 815 پاسيەنت كەلىپ، ولاردىڭ 15 442ء-سى اۋرۋحاناعا جاتقىزىلعان. ەمدەلۋشىلەردىڭ 70 پايىزى قابىلداۋ ءبولىمى مەن تراۆماتولوگيالىق پۋنكتكە ءجيى جۇگىنەدى. وسىعان وراي اۋرۋحانا باسشىلىعى پاسيەنتتەردى قولداۋ قىزمەتىن ءتورتىنشى قاباتتان ءبىرىنشى قاباتقا كوشىردى. ەندى ناۋقاستار ەش كەدەرگىسىز ورتالىق قىزمەتىنە جۇگىنە الادى. بۇل شاعىمدار بەرۋ پروسەسىن جەڭىلدەتىپ، كۇتۋ ۋاقىتىن ازايتۋعا جانە پاسيەنتتەردىڭ قۇقىقتارىن قورعاۋعا جاۋاپتى مامانداردىڭ قولجەتىمدىلىگىن ارتتىرادى. اشىلۋ سالتاناتىندا ءسوز العان دەنساۋلىق ساقتاۋ ءمينيسترى اقمارال ءالنازاروۆا پاسيەنتتەردى قولداۋ ورتالىعى داۋلى جاعدايلاردى جەدەل شەشۋگە جانە دارىگەرلەرمەن ءوزارا ءىس-قيمىل جاساۋعا كومەكتەسەتىنىن اتاپ ءوتتى.
«پرەزيدەنتتىڭ تاپسىرماسى اياسىندا سەمەي قالاسىندا دارىگەرلەردى كاسىبي ساقتاندىرۋ جۇيەسىن ەنگىزدىك. سونىمەن قاتار، پاسيەنتتەردىڭ ماسەلەلەرى تەز ارادا شەشىلسىن دەگەن نيەتپەن وسىنداي ورتالىقتاردى اشىپ جاتىرمىز. قازىرگى تاڭدا رەسپۋبليكا بويىنشا 6 مىڭنان استام ادام وسى قىزمەتتە جۇمىس اتقارۋدا. بۇل ورتالىق اباي وبلىسىنىڭ تۇرعىندارىنا سەپتىگىن تيگىزەدى دەگەن سەنىمدەمىن»،- دەدى دەنساۋلىق ساقتاۋ ءمينيسترى.
پاسيەنتتەردى قولداۋ قىزمەتىنىڭ نەگىزگى مىندەتى - ەمدەلۋشىلەر مەن ولاردىڭ تۋىستارىنا اقپاراتتىق جانە كونسۋلتاتيۆتىك كومەك كورسەتۋ، شاعىمدار مەن ۇسىنىستاردى قابىلداپ، جەدەل قاراستىرۋ.
ورتالىقتىڭ اشىلۋ سالتاناتىنان كەيىن دەنساۋلىق ساقتاۋ ءمينيسترى اقمارال ءالنازاروۆا اباي وبلىسىنىڭ اكىمى بەرىك ۋاليمەن بىرگە وبلىستىق جەدەل جاردەم اۋرۋحاناسىنىڭ بولىمشەلەرىن ارالاپ، جۇمىسىمەن تانىستى. مەكەمەنى ارالاۋ بارىسىندا مينيستر ايماق باسشىسىنا جەدەل جاردەم اۋرۋحاناسىنىڭ مۇمكىندىگىن كەڭەيتۋ ءۇشىن سەمەي مەديسينا ۋنيۆەرسيتەتى اۋماعىندا نەيروينسۋلتتىق بولىمشەسىن اشۋ تۋرالى ۇسىنىس ايتتى.
ايماق باسشىسى وبلىستىق جەدەل جاردەم اۋرۋحاناسىنا اكىمدىك تاراپىنان ءتيىستى قولداۋ بولاتىنىن اتاپ ءوتتى.
«بۇل مەكەمەنىڭ ماسەلەلەرىمەن جاقسى تانىسپىن. عيمارات قۇرىلىسى اۋەلدە دۇرىس جوسپارلانباعان. درەناج جۇيەسى دە دۇرىس جوبالانباعان. جەراستى سۋىنىڭ كوتەرىلۋىنە بايلانىستى اۋرۋحانانىڭ جەرتولەسىنە سۋ جايىلعان. بۇل ماسەلەنى شەشۋ ءۇشىن ءتيىستى جوبالىق-سمەتالىق قۇجاتتار دايىندالىپ، مەملەكەتتىك ساراپتاماعا جىبەرىلدى. قازىرگى ۋاقىتتا جەدەل جاردەم اۋرۋحاناسىنىڭ كورپۋستارىنىڭ شاتىرى مەن قاسبەتتەرىنە كۇردەلى جوندەۋ جۇرگىزىلۋدە. بۇعان وبلىستىق بيۋدجەتتەن قارجى بولىنگەن. قۇرىلىس جۇمىستارى جەكە باقىلاۋىمدا بولادى»، - دەدى وبلىس اكىمى.
