Semei qalasynyń qos jaǵalaýyn bailanystyryp turǵan aspaly kópirdiń asfalt jabyny tolyq aýystyrylady. Oblys ákimi Berik Ýáli «Jol aktivteriniń ulttyq sapa ortalyǵy» mamandarymen birge kólik ótkelinde bastalǵan jóndeý jumystarynyń barysymen tanysty, – dep habarlaidy Dalanews.kz
27 mamyrdan bastap kópirdegi qozǵalys shemasy ózgerip, kólikter tórt jolaqpen qatynaýda. Qazirgi ýaqytta eski asfalt alynyp jatyr. Buǵan deiin bul nysanda tek oiyqtardy jamaý jumystary atqarylsa, endi júris bóligi tolyq jańartylady. Jańa asfalt zamanaýi standarttarǵa sai sapaly materialdan tóseledi.
Asfaltty aýystyrýǵa 80-ge jýyq jumysshy jáne 20-dan astam arnaiy tehnika tartylǵan. Joba boiynsha jóndeý jumystary shilde aiynyń basynda aiaqtalady dep josparlanyp otyr.
Aimaq basshysy merdigerlerge jumysty sapaly júrgizip, ýaqtyly aiaqtaýdy tapsyrdy.
«TMD-daǵy jalǵyz, úlken aspaly kópirimiz 2000 jyly paidalanýǵa berilgen. Sol ýaqyttan beri asfalt tósemi tolyq aýystyrylmaǵan. 25 jyl boiy jamap, jasqap, oi-shuńqyrlaryn bitep kelgen. Alǵash ret osyndai aýqymdy jumysty qolǵa alyp jatyrmyz. Ýaqytsha shekteýlerge halyq túsinistikpen qaraidy dep oilaimyn. Jumys barysynda zamanaýi tehnologiialar qoldanylady. Jóndeý jumystaryn «Jol aktivteriniń ulttyq sapa ortalyǵy» mamandary qadaǵalaidy», – dedi oblys ákimi.
Aimaq basshysy qalany aralaý barysynda «Pristan» shaǵyn aýdanyn damytý jobasymen tanysty.
Bul aýmaqta qýattylyǵy 2,7 Gkal bolatyn eski jylý qazandyǵy ornalasqan. Qazandyq birneshe turǵyn úi men biznes nysandaryn jylýmen qamtamasyz etip otyr. Qala ákiminiń mindetin atqarýshy Bekjan Bapyshev oblys ákimine shaǵyn aýdandy damytýǵa qatysty usynystaryn aitty. Atalǵan aýmaqta keleshekte kópqabatty turǵyn úiler, áleýmettik nysandar salý josparlanyp otyr.
