سەمەي قالاسىنىڭ قوس جاعالاۋىن بايلانىستىرىپ تۇرعان اسپالى كوپىردىڭ اسفالت جابىنى تولىق اۋىستىرىلادى. وبلىس اكىمى بەرىك ءۋالي «جول اكتيۆتەرىنىڭ ۇلتتىق ساپا ورتالىعى» ماماندارىمەن بىرگە كولىك وتكەلىندە باستالعان جوندەۋ جۇمىستارىنىڭ بارىسىمەن تانىستى، – دەپ حابارلايدى Dalanews.kz
27 مامىردان باستاپ كوپىردەگى قوزعالىس سحەماسى وزگەرىپ، كولىكتەر ءتورت جولاقپەن قاتىناۋدا. قازىرگى ۋاقىتتا ەسكى اسفالت الىنىپ جاتىر. بۇعان دەيىن بۇل نىساندا تەك ويىقتاردى جاماۋ جۇمىستارى اتقارىلسا، ەندى ءجۇرىس بولىگى تولىق جاڭارتىلادى. جاڭا اسفالت زاماناۋي ستاندارتتارعا ساي ساپالى ماتەريالدان توسەلەدى.
اسفالتتى اۋىستىرۋعا 80-گە جۋىق جۇمىسشى جانە 20-دان استام ارنايى تەحنيكا تارتىلعان. جوبا بويىنشا جوندەۋ جۇمىستارى شىلدە ايىنىڭ باسىندا اياقتالادى دەپ جوسپارلانىپ وتىر.
ايماق باسشىسى مەردىگەرلەرگە جۇمىستى ساپالى جۇرگىزىپ، ۋاقتىلى اياقتاۋدى تاپسىردى.
«تمد-داعى جالعىز، ۇلكەن اسپالى كوپىرىمىز 2000 جىلى پايدالانۋعا بەرىلگەن. سول ۋاقىتتان بەرى اسفالت توسەمى تولىق اۋىستىرىلماعان. 25 جىل بويى جاماپ، جاسقاپ، وي-شۇڭقىرلارىن بىتەپ كەلگەن. العاش رەت وسىنداي اۋقىمدى جۇمىستى قولعا الىپ جاتىرمىز. ۋاقىتشا شەكتەۋلەرگە حالىق تۇسىنىستىكپەن قارايدى دەپ ويلايمىن. جۇمىس بارىسىندا زاماناۋي تەحنولوگيالار قولدانىلادى. جوندەۋ جۇمىستارىن «جول اكتيۆتەرىنىڭ ۇلتتىق ساپا ورتالىعى» ماماندارى قاداعالايدى»، – دەدى وبلىس اكىمى.
ايماق باسشىسى قالانى ارالاۋ بارىسىندا «پريستان» شاعىن اۋدانىن دامىتۋ جوباسىمەن تانىستى.
بۇل اۋماقتا قۋاتتىلىعى 2،7 گكال بولاتىن ەسكى جىلۋ قازاندىعى ورنالاسقان. قازاندىق بىرنەشە تۇرعىن ءۇي مەن بيزنەس نىساندارىن جىلۋمەن قامتاماسىز ەتىپ وتىر. قالا اكىمىنىڭ مىندەتىن اتقارۋشى بەكجان باپىشيەۆ وبلىس اكىمىنە شاعىن اۋداندى دامىتۋعا قاتىستى ۇسىنىستارىن ايتتى. اتالعان اۋماقتا كەلەشەكتە كوپقاباتتى تۇرعىن ۇيلەر، الەۋمەتتىك نىساندار سالۋ جوسپارلانىپ وتىر.
