Ótken jyldyń jeltoqsanynda semeılikter jalpyqalalyq baǵdarǵa jiberilgen 20 jańa avtobýsty erekshe qoshemetpen qarsy aldy. Álbette, jyldar boıy kútken jańalyqtyń kóptiń kóńilinen shyqqany anyq. Esterińizge sala ketsek, oblys ákimi Danıal Ahmetov Shyǵys Qazaqstannyń iri eki qalasyndaǵy qoǵamdyq kóliktiń sapasynyń birneshe ret qatań synǵa alǵany belgili. Oǵan sebep, jolaqysyn kóterýdi talap etýden jalyqpaıtyn tasymaldaýshylardyń ondaǵan jyldar boıy avtobýstardy jańartýǵa degen qulyqsyzdyǵy.

Semeıge qoǵamdyq kólik qyzmetiniń sapasyn jaqsartýǵa «BusReport» baǵdarlamasynyń kómegi zor boldy. Endi qalalyqtar barlyq baǵyttaǵy qoǵamdyq kólikterdiń qozǵalysyn «InfoBus» mobıldi qosymsha arqyly baqylaı alady. Búginde GPS-monıtorıngi bar ınteraktıvti kartany 43 myńnan asa semeılik qoldanýda.

«BusReport» baǵdarlamasy tasymaldaýshylar tarapynan birqatar olqylyqtardy anyqtaǵanyn da aıta ótken jón. Máselen, byltyr  №5, 8, 10, 22, 24, 37, 43 jáne 45 boıynsha 8 baǵytta qyzmet kórsetken «Semavtopark» JSHS-men sot arqyly kelisimshart buzyldy. Qazir bul baǵdarlar baıqaý ótkenge deıin «Mýsapırov» JK jáne «Taksomotornyı park» JSHS enshisine ótti.

Semeı qalasynyń ákimi Ermak Sálimov aımaq basshysy Danıal Ahmetov aıtqan synnyń oryndy ekenin atap ótti. 2015 jyly kólik mınıstrligi «tasymaldaýshylardyń árbir 2 jyl saıyn avtobýstardy jańartyp turýy qajettigi» týraly buıryǵy shyqqan. Bul talap tasymaldaýshylarmen 5 jyl buryn jasalǵan kelisimde bolǵan joq.

– Bıyldan bastap oblys ákiminiń tapsyrmasymen avtobýs parkterin jańartý maqsatynda baıqaýlardyń talaptary túbegeıli ózgertildi. Seń sógilgenin aıta óteıik. Aldaǵy ótetin baıqaý qarsańynda tasymaldaýshy kásiporyndar jyljymaly quramdaryn jańarta bastady. Mysaly, «Mýsapırov» JK qala boıynsha № 5,8,22 baǵytynda qyzmet kórsetetin orta sanattaǵy 20 jaıly avtobýsy bar parkti jańalady. Onyń ústine orta sanattaǵy taǵy 50 avtobýs alýdy josparlap otyr, – dedi suhbat barysynda qala basshysy Ermak Sálimov.

Jaqynda Semeıde elektrondy bılet máselesi sheshimin tappaq. Sonymen qatar, qalanyń qoǵamdyq kólikterinde WIFI symsyz ınternet jelisi de  ornatylmaq.

Al Óskemende jolaýshy tasymaldaýshylarynyń máselesi ýshyǵyp tur. Oblys basshysy Danıal Ahmetov kásipkerlermen kezdesip, oryn alǵan olqylyqtardy zań sheńberinde sheshýge kómektesetinin jetkizdi. Dese de, avtobýs parkin jańartý talaby kún tártibinen túspek emes.

– Avtobýstardy jańartý isine uqyptylyqpen qarap, myqtap qolǵa alýdy tapsyramyn. Semeıde jańa qoǵamdyq kólikter satyp alynyp jatyr. Óskemen qalasynyń ákimi Qýat Tumabaev pen tasymaldaýshylarǵa jol kartasyn ázirleýge 10 kún ýaqyt beremin, – dedi tasymaldaýshylarmen kezdesken Danıal Ahmetov.

Esterińizge sala keteıik, 2017 jyldyń qysynda qalalyq qoǵamdyq kólik jolaqysy 90 teńgege kóterilgen. Ol kezdegi kásipkerler ýáji men ýádesi tasymaldaý jaǵdaıyn jaqsaratý edi.

 

SHQO ákiminiń baspasóz qyzmeti