Semeige qoǵamdyq kólik qyzmetiniń sapasyn jaqsartýǵa «BusReport» baǵdarlamasynyń kómegi zor boldy. Endi qalalyqtar barlyq baǵyttaǵy qoǵamdyq kólikterdiń qozǵalysyn «InfoBus» mobildi qosymsha arqyly baqylai alady. Búginde GPS-monitoringi bar interaktivti kartany 43 myńnan asa semeilik qoldanýda.
«BusReport» baǵdarlamasy tasymaldaýshylar tarapynan birqatar olqylyqtardy anyqtaǵanyn da aita ótken jón. Máselen, byltyr №5, 8, 10, 22, 24, 37, 43 jáne 45 boiynsha 8 baǵytta qyzmet kórsetken «Semavtopark» JShS-men sot arqyly kelisimshart buzyldy. Qazir bul baǵdarlar baiqaý ótkenge deiin «Mýsapirov» JK jáne «Taksomotornyi park» JShS enshisine ótti.
– Biyldan bastap oblys ákiminiń tapsyrmasymen avtobýs parkterin jańartý maqsatynda baiqaýlardyń talaptary túbegeili ózgertildi. Seń sógilgenin aita óteiik. Aldaǵy ótetin baiqaý qarsańynda tasymaldaýshy kásiporyndar jyljymaly quramdaryn jańarta bastady. Mysaly, «Mýsapirov» JK qala boiynsha № 5,8,22 baǵytynda qyzmet kórsetetin orta sanattaǵy 20 jaily avtobýsy bar parkti jańalady. Onyń ústine orta sanattaǵy taǵy 50 avtobýs alýdy josparlap otyr, – dedi suhbat barysynda qala basshysy Ermak Sálimov.
Jaqynda Semeide elektrondy bilet máselesi sheshimin tappaq. Sonymen qatar, qalanyń qoǵamdyq kólikterinde WIFI symsyz internet jelisi de ornatylmaq.
Al Óskemende jolaýshy tasymaldaýshylarynyń máselesi ýshyǵyp tur. Oblys basshysy Danial Ahmetov kásipkerlermen kezdesip, oryn alǵan olqylyqtardy zań sheńberinde sheshýge kómektesetinin jetkizdi. Dese de, avtobýs parkin jańartý talaby kún tártibinen túspek emes.
– Avtobýstardy jańartý isine uqyptylyqpen qarap, myqtap qolǵa alýdy tapsyramyn. Semeide jańa qoǵamdyq kólikter satyp alynyp jatyr. Óskemen qalasynyń ákimi Qýat Tumabaev pen tasymaldaýshylarǵa jol kartasyn ázirleýge 10 kún ýaqyt beremin, – dedi tasymaldaýshylarmen kezdesken Danial Ahmetov.
Esterińizge sala keteiik, 2017 jyldyń qysynda qalalyq qoǵamdyq kólik jolaqysy 90 teńgege kóterilgen. Ol kezdegi kásipkerler ýáji men ýádesi tasymaldaý jaǵdaiyn jaqsaratý edi.
ShQO ákiminiń baspasóz qyzmeti
