سەمەيگە قوعامدىق كولىك قىزمەتىنىڭ ساپاسىن جاقسارتۋعا «BusReport» باعدارلاماسىنىڭ كومەگى زور بولدى. ەندى قالالىقتار بارلىق باعىتتاعى قوعامدىق كولىكتەردىڭ قوزعالىسىن «InfoBus» ءموبيلدى قوسىمشا ارقىلى باقىلاي الادى. بۇگىندە GPS-مونيتورينگى بار ينتەراكتيۆتى كارتانى 43 مىڭنان اسا سەمەيلىك قولدانۋدا.
«BusReport» باعدارلاماسى تاسىمالداۋشىلار تاراپىنان ءبىرقاتار ولقىلىقتاردى انىقتاعانىن دا ايتا وتكەن ءجون. ماسەلەن، بىلتىر №5، 8، 10، 22، 24، 37، 43 جانە 45 بويىنشا 8 باعىتتا قىزمەت كورسەتكەن «سەماۆتوپارك» جشس-مەن سوت ارقىلى كەلىسىمشارت بۇزىلدى. ءقازىر بۇل باعدارلار بايقاۋ وتكەنگە دەيىن «مۋساپيروۆ» جك جانە «تاكسوموتورنىي پارك» ج ش س ەنشىسىنە ءوتتى.
سەمەي قالاسىنىڭ اكىمى ەرماك ءسالىموۆ ايماق باسشىسى دانيال احمەتوۆ ايتقان سىننىڭ ورىندى ەكەنىن اتاپ ءوتتى. 2015 جىلى كولiك مينيسترلiگi «تاسىمالداۋشىلاردىڭ ءاربىر 2 جىل سايىن اۆتوبۋستاردى جاڭارتىپ تۇرۋى قاجەتتىگى» تۋرالى بۇيرىعى شىققان. بۇل تالاپ تاسىمالداۋشىلارمەن 5 جىل بۇرىن جاسالعان كەلىسىمدە بولعان جوق.
– بيىلدان باستاپ وبلىس اكىمىنىڭ تاپسىرماسىمەن اۆتوبۋس پاركتەرىن جاڭارتۋ ماقساتىندا بايقاۋلاردىڭ تالاپتارى تۇبەگەيلى وزگەرتىلدى. سەڭ سوگىلگەنىن ايتا وتەيىك. الداعى وتەتىن بايقاۋ قارساڭىندا تاسىمالداۋشى كاسىپورىندار جىلجىمالى قۇرامدارىن جاڭارتا باستادى. مىسالى، «مۋساپيروۆ» جك قالا بويىنشا № 5،8،22 باعىتىندا قىزمەت كورسەتەتىن ورتا ساناتتاعى 20 جايلى اۆتوبۋسى بار پاركتى جاڭالادى. ونىڭ ۇستىنە ورتا ساناتتاعى تاعى 50 اۆتوبۋس الۋدى جوسپارلاپ وتىر، – دەدى سۇحبات بارىسىندا قالا باسشىسى ەرماك ءسالىموۆ.
جاقىندا سەمەيدە ەلەكتروندى بيلەت ماسەلەسى شەشىمىن تاپپاق. سونىمەن قاتار، قالانىڭ قوعامدىق كولىكتەرىندە WIFI سىمسىز ينتەرنەت جەلىسى دە ورناتىلماق.
ال وسكەمەندە جولاۋشى تاسىمالداۋشىلارىنىڭ ماسەلەسى ۋشىعىپ تۇر. وبلىس باسشىسى دانيال احمەتوۆ كاسىپكەرلەرمەن كەزدەسىپ، ورىن العان ولقىلىقتاردى زاڭ شەڭبەرىندە شەشۋگە كومەكتەسەتىنىن جەتكىزدى. دەسە دە، اۆتوبۋس پاركىن جاڭارتۋ تالابى كۇن تارتىبىنەن تۇسپەك ەمەس.
– اۆتوبۋستاردى جاڭارتۋ ىسىنە ۇقىپتىلىقپەن قاراپ، مىقتاپ قولعا الۋدى تاپسىرامىن. سەمەيدە جاڭا قوعامدىق كولىكتەر ساتىپ الىنىپ جاتىر. وسكەمەن قالاسىنىڭ اكىمى قۋات تۇمابايەۆ پەن تاسىمالداۋشىلارعا جول كارتاسىن ازىرلەۋگە 10 كۇن ۋاقىت بەرەمىن، – دەدى تاسىمالداۋشىلارمەن كەزدەسكەن دانيال احمەتوۆ.
ەستەرىڭىزگە سالا كەتەيىك، 2017 جىلدىڭ قىسىندا قالالىق قوعامدىق كولىك جولاقىسى 90 تەڭگەگە كوتەرىلگەن. ول كەزدەگى كاسىپكەرلەر ءۋاجى مەن ۋادەسى تاسىمالداۋ جاعدايىن جاقساراتۋ ەدى.
شقو اكىمىنىڭ باسپا ءسوز قىزمەتى
