Semei qalasynda Abaidyń 180 jyldyǵyna arnalǵan «Sulý Syrdan - uly Abai eline» atty Qyzylorda oblysynyń óner kúnderi ótti, dep habarlaidy Dalanews.kz
Oblys ákimi Nurlybek Nálibaev bastaǵan delegatsiia quramynda Parlament Senaty men Májilisiniń depýtattary N.Baiqadamov, R.Rústemov, M.Ergeshbaev, oblystyq ardagerler keńesiniń tóraǵasy S.Dúisenbaev, aimaq ardagerleri, ziialy qaýym ókilderi, Turmaǵambet atyndaǵy halyq aspaptar, simfoniia orkestrleri, «Syr samaly» vokaldy-aspapty, «Tomiris» bi ansamblderi, hor ujymy, basqa da ónerpazdar bar.
Aldymen Semeidegi Abai atyndaǵy teatrda «Syr óńiri – túrki órkenietiniń altyn besigi» atty kórme ashyldy. Ony Qyzylorda oblysynyń ákimi Nurlybek Nálibaev, Abai oblysynyń ákimi Berik Ýáli aralap kórdi.
Qyzylorda oblystyq tarihi-ólketaný mýzeii qoryndaǵy qundy jádigerlerden jasaqtalǵan kórme 3 bólimnen turady.
Ondaǵy «Shirik Rabat saq jaýyngeri», «Syǵanaq hanshaiymy», «Túgisken kósemi», «Jetiasar aqsúiek áieli» arheologiialyq rekonstrýktsiialary arheologiialyq-etnografiialyq ekspeditsiialar kezinde tabylǵan jádigerlerdi negizge alyp jasalǵan.
Kelýshiler nazaryna arheologiialyq altyndar kollektsiiasy, atap aitqanda Shirik Rabat jáne Bábish mola qalashyqtarynan tabylǵan altyn japsyrmalar, Syǵanaq qalashyǵynan tabylǵan altyn syrǵalar, tumar, túimeler jáne marjan monshaqtardyń túpnusqa kollektsiiasy usynyldy. Jankent, Asanas, Qyshqala, Syǵanaqtan t.b. tabylǵan terrakotalar, glazýrli qaptamalar, qysh ydystar jáne Bidaiyqasar qalashyǵynan tabylǵan qossaz dombyra kóshirmesi de Abai eli turǵyndarynyń qyzyǵýshylyǵyn týǵyzdy.
Kórmege qoiylǵan zergerlik buiymdar kollektsiiasynyń tarihy bai. Syr boiynyń qazaq áielderi taǵynǵan kúmis áshekeilerdiń, iaǵni óńirjiek, jyrǵa, alqanyń, tutynǵan aǵash jihazdarynyń, ydystardyń, teri buiymdarynyń, er qarýy bolǵan qylysh, aibalta, semser, shoqpar, naiza, qalqan, jebeniń qundylyǵy jaiynda bilgisi keletinder qatary kóp boldy.
Sondai-aq, túrki dúniesiniń uly abyzy Qorqyt atanyń «Dede Qorqyt» kitabynyń Drezden nusqasy, nar qobyz, IýNESKO sertifikaty, kádesyilar, úsh júzdiń piri bolǵan Maral ishannan jetken kók asa, Maral babanyń oqqaǵary bolǵan Tájige tiesili Kerei eriniń túpnusqasy, Qalqai ishan, Serdaly Bekshorin, Er Seitpenbet, Buqarbai batyr paidalanǵan mórlerdiń kóshirmeleri de kórme tórinen oryn alǵan.
Semeilikter Abaidyń 1922 jyly jaryq kórgen óleńder jinaǵynyń, Qyzylordanyń Qazaq AKSR-iniń astanasy bolǵanyna 100 jyl tolýyna orai foto jáne arhivtik qujattardyń qyr-syryna qanyqty.
