Semeide jergilikti kásipkerler men qolónershilerdi qoldaý maqsatynda «Bir aýyl – bir ónim» jáne «Qazaqstannyń úzdik taýary» atty óńirlik baiqaý-kórmeleri ótti,- dep habarlaidy Dalanews.kz
Abai oblystyq kásipkerler palatasy uiymdastyrǵan eki joba da óńirdegi shaǵyn biznesti damytýdy, jergilikti resýrstardy tiimdi paidalanyp, sapaly ónim óndirýshilerdi anyqtaýdy jáne olardyń naryqqa shyǵýyn qoldaýdy kózdeidi.
Kórmeniń ashylýyna qatysyp, sóz sóilegen oblys ákimi Berik Ýáli jergilikti biznestiń óńirdiń damýyna qosatyn úlesi zor ekenin erekshe atap ótti.
«Abai oblysynyń kásipkerleri osy baiqaýǵa jyl saiyn zor qyzyǵýshylyqpen qatysyp keledi. Biyl óńirimizden barlyǵy 13 kásipkerlik sýbektisi, iaǵni jeke kásipkerler men kompaniialar niet bildirip, resmi túrde qatysýshylar tizimine endi. Bul – óńirimizde sapaly ónim shyǵaryp otyrǵan kásipkerler qaýymynyń belsendiligin, óz isine degen jaýapkershiligin aiqyn kórsetedi. Memleket basshysy Qasym-Jomart Kemeluly Toqaev otandyq biznes ókilderimen kezdesýinde «Memleket elimizdiń óndirisine qarjy salatyn, turaqty jumys oryndaryn ashatyn adal kásipkerlerdi árdaiym qoldaidy», – dep atap ótken bolatyn. Sondyqtan Abai oblysynyń ákimdigi tarapynan biznesti damytý men qoldaý baǵytyndaǵy aldaǵy ýaqytta da jumystar jalǵasa beredi. Biz árqashan sizderdiń seriktesterińiz bolýǵa, sondai-aq biznestiń damýyna kedergi keltiretin máseleler bolsa, olardy tez arada zań aiasynda sheshýge daiyn ekenimizdi jetkizgim keledi. Sizderge búgingi baiqaýda sáttilik tileimin! Eńbekterińiz laiyqty baǵalanyp, jańa múmkindikterge jol ashylsyn», - dedi aimaq basshysy.
Oblys ákimi kórmeni aralap, qatysýshylardyń ónimderimen tanysty. Ár pavilonǵa arnaiy toqtap, kásipkerlermen tildesip, usynylǵan taýarlar men jobalar týraly pikir almasty.
«Bir aýyl – bir ónim» jobasyna biyl oblys boiynsha 42 ótinim qabyldandy. Qatysýshylardyń basym bóligi Semei qalasynan (34 adam), qalǵan 9-y – aýdandardan. Jobaǵa qatysýshylar tamaq ónerkásibi, ulttyq naqyshtaǵy kiim, qolóner buiymdary, saz jáne bylǵary zattar, tabiǵi sabyn, aǵashtan jasalǵan buiymdar, bódene eti men jumyrtqasy, sondai-aq shópten daiyndalatyn tunbalar baǵytynda ónim usyndy. Joba aiasynda qatysýshylarǵa keńes berý, oqytý, logotip jasaý, marketingtik qoldaý kórsetý jáne 5 million teńgege deiingi grantqa qatysý múmkindigi berildi.
Al «Qazaqstannyń úzdik taýary» óńirlik baiqaý-kórmesine oblys boiynsha 10-nan astam kásipkerlik sýbektisi qatysty. Kásipkerler óz ónimderin úsh nominatsiia – «Óndiristik maqsattaǵy úzdik taýarlar», «Halyqqa arnalǵan úzdik taýarlar» jáne «Úzdik azyq-túlik taýarlary» boiynsha usyndy. Saraptamalyq top barlyq qatysýshylardyń ónimin baǵalap, úzdikterin iriktedi.
Eki joba boiynsha júldeli oryn ielengender Astana qalasynda ótetin respýblikalyq kórmege joldama alady.
Aita keteiik, 2023 jyly oblysymyzdyń «UK UNIS» JShS shulyq-toqyma fabrikasy respýblikalyq baiqaýda jeńimpaz atandy. 1 387 qatysýshynyń ishinde úzdik toǵyzdyqqa engen osy kásiporyn tórt jyl boiy «Qazaqstannyń úzdik taýary» belgisin qoldaný quqyǵyna ie boldy.
