Jetisý oblysynda ótken demalys kúnderi birneshe qaiǵyly oqiǵa tirkeldi. Shomylýǵa tyiym salynǵan sý aidyndarynda eresekterdiń qaraýynsyz qalǵan tórt bala kóz jumdy, dep habarlaidy dalanews.kz.
Bul týraly Tótenshe jaǵdailar departamenti habarlap, ata-analardy sý jaǵasynda qaraýsyz qaldyrmaýǵa shaqyrdy.
Vedomstvo málimetinshe, qaiǵyly oqiǵalar Kerbulaq, Qaratal jáne Sarqan aýdandarynda bolǵan. Barlyq jaǵdaida balalar shomylýǵa tyiym salynǵan oryndarǵa barǵan.
27 maýsymda Kerbulaq aýdanynda 11 jáne 9 jastaǵy eki qyz eresektersiz Araltóbe aýyly mańyndaǵy kólge shomylýǵa baryp, sýǵa batyp ketken.
Sol kúni Qaratal aýdanyndaǵy Úshtóbe qalasy mańynda ózen jaǵasynda demalyp júrgen otbasynyń eki jasar balasy abaisyzda sýǵa qulap, aǵysqa tótep bere almai qaza tapqan.
Al jeksenbide Sarqan aýdanynda Balqash kóliniń jabdyqtalmaǵan jaǵajaiynda úsh jasar bala sýǵa batyp ketken. Ol da eresekterdiń qaraýynsyz qalǵan.
Qazir Jetisý oblysynda resmi túrde shomylýǵa ruqsat etilgen tórt oryn ǵana bar. Olar - Taldyqorǵan qalalyq jaǵajaiy, Alakóldegi Aqshi jáne Kóktuma aýyldaryndaǵy demalys aimaqtary, sondai-aq, Balqash kóliniń Lepsi aýylyndaǵy jaǵajaiy.
