Atyraý oblysy Saǵyz aýylynda ulynan zábir kórgeni aitylǵan 89 jastaǵy tyl ardageri Ádilhan Sisenovti nemeresi Nurbaqyt Aqnietqyzy óz qamqorlyǵyna aldy, dep habarlaidy dalanews.kz.
Buǵan deiin BAQ-ta 1937 jyly týǵan qariiany kenje uly uryp-soǵyp, úide skotchpen bailap tastaǵany týraly aqparat taraǵan edi. Óz ýaqytynda sovhozda 40 jyl boiy basshylyq qyzmet atqarǵan aqsaqal qazir qalada turatyn nemeresiniń úiine kóshirilip, kútimge alynǵan.
Nemeresi áleýmettik jeli qoldanýshylarynyń suraqtaryna jaýap berip, aýylǵa kóbine amandasý úshin ǵana baryp turǵandyqtan, úi ishindegi naqty jaǵdaidy eshkim bilmegenin aitty. Ol Instagram paraqshasynda video jariialap, bul oqiǵa búkil áýlet úshin aýyr soqqy bolǵanyn jetkizdi.
"Keide ómir adamǵa eń aýyr sabaqty bótennen emes, óz qanyńnan beredi. Bir ákeniń mańdai terimen ósirgen 8 uly men 4 qyzy, bir shańyraqtan taraǵan úlken áýlet, bir dastarhanda otyrǵan baýyrlar... Al búgin sol áýlettiń júregi qan jylap otyr", – dep jazdy ol.
Nurbaqyt Aqnietqyzy qariianyń 90 jasqa taiaǵan shaǵynda balalary men nemere-shóberesiniń qyzyǵyn kóremin dep ómir súrgenin, qartaiǵanda óz balalaryna súienemin dep sengenin aitty. Onyń sózinshe, ata – áýlettiń tamyry, shańyraqtyń shyraǵy jáne urpaqqa amanat.
Ataǵa túsken aýyrlyq – bir adamnyń ǵana qaiǵysy emes. Ol – tutas áýlettiń júregine túsken jara. Biz bul videony eshkimdi qaralaý úshin emes, ár adamnyń júregine oi salý úshin bólisip otyrmyz", – dedi nemeresi.
Ol mundai jasta adamǵa bailyq ta, ataq ta emes, balasynyń jyly sózi, nemeresiniń qushaǵy jáne otbasynyń amandyǵy ǵana qajet ekenin jazdy. Sonymen birge jaqyn adamnyń júrekke salǵan jarasy aýyr bolatynyn jetkizdi.
"Biz eshkimge ósh emespiz. Bizge kek kerek emes. Bizge janjal kerek emes. Bizge tek atamyzdyń júregindegi jaranyń jazylǵany kerek", – dep jazdy Nurbaqyt Aqnietqyzy.
Nemeresi kópshilikti ata-anany barynda qadirleýge, qarttardy qurmetteýge shaqyrdy. Ol ár adam bir kúni qartaiatynyn, sol kezde balasynan meiirim kútetinin eske saldy.
"Búgin ata-anamyzdy qadirleiik. Barynda baǵalaiyq. Jyly sózimizdi aityp úlgereiik. Erteń kesh bolyp qalmasyn. Alla eshbir shańyraqqa mundai synaq bermesin", – dep túiindedi ol.
