Búgin oblys ákimi Berik Ýáli Shri-Lankada ótken bokstan jastar arasyndaǵy Aziia chempionatynyń jeńimpazdary men olardyń bapkerlerin qabyldap, halyqaralyq arenadaǵy joǵary jetistikterimen quttyqtady,- dep habarlaidy Dalanews.kz
Kezdesýge Abai oblysy boiynsha áýesqoi boks federatsiiasy qoǵamdyq birlestiginiń atqarýshy direktory Jaqsylyq Iliasov pen atalǵan uiymnyń basshylary qatysty.
Janel Imantaeva 54 keli salmaq dárejesinde Aziia chempiony bolyp, Qazaqstan Respýblikasynyń sport sheberine úmitker atandy. Ol 2024 jyly Reseidiń Iakýtsk qalasynda ótken Aziia balalary sporttyq oiyndarynyń qola júldegeri, 2023 jyly Astanada ótken jastar arasyndaǵy Qazaqstan chempionatynyń kúmis júldegeri.
Aqnur Tursynǵali 57 keli salmaqta óner kórsetip, Aziia chempionatynda altyn medal ielendi. 2024 jylǵy Qazaqstan chempionatynda kúmis, 2023 jyly ótken el chempionatynda qola júlde jeńip alǵan.
Aimaq basshysy kezdesý barysynda boksshylarǵa jáne olardyń bapkerlerine Alǵys hat pen aqshalai sertifikat tabys etti.
Oblys ákimi quttyqtaý sózinde óńirde boks joǵary deńgeide damyp kele jatqanyn atap ótti.
«Abai eli, Semei óńiri – kóptegen sport túrleriniń Otany. Aimaqta fýtbol, kúres, boks jaqsy damyp keledi.Mine, ózderińiz oblysymyzǵa Aziia chempiony ataǵyn ákelip otyrsyzdar. Bul – óńirimiz úshin merei, oblysymyz úshin maqtanysh. Joǵary jetistikterińizben oblys atynan quttyqtaimyz. Jattyqtyrýshylar Asan Seksenbaev pen Ǵaisa Ernarǵa rahmet aitamyn. Bolashaqta Janel men Aqnur budan da biik jetistikterge jetip, olimp shyńyn baǵyndyrady dep senemiz. Sportshylardyń jattyǵýlary men jarystarǵa barýyna qoldaý kórsetip, demeýshilik jasap júrgen kásipker, metsenat Mahat Tórálige erekshe alǵys aitamyn. Ózińiz oblystyń boks federatsiiasynyń tizginin ustaǵaly osyndai aqjoltai jańalyqtar jii bolyp jatyr. Aldaǵy ýaqytta sáttilik tileimin. Óńirde sporttyq infraqurylymdy damytýǵa jiti kóńil bólip, kóptegen aýqymdy sharalar atqaryp jatyrmyz. Biyl oblysymyzdyń qala-aýdandarynda júzý basseini, sporttyq modýlder, dene shynyqtyrý-saýyqtyrý keshenderi salynady. Bul baǵyttaǵy jumysty jalǵastyramyz», - dedi aimaq basshysy.
Óńirde sońǵy jyldary boks qarqyndy damyp keledi. Kúni keshe oblysymyzdyń týmasy Erasyl Jaqpekov Niderlandta ótken «Eindhoven Box Cup» halyqaralyq týrnirinde altynnan alqa taǵyndy. Ol byltyr Tailandtaǵy bokstan Aziia chempionatynda qola, biyl 21 jasqa deiingi sportshylar arasyndaǵy Aziia chempionatynda altyn medal ielengen bolatyn. Osy jarysta jerlesterimiz Ernar Karap pen Rýslan Kúzeýbaev kúmis medal aldy.
Aita keteiik, búginde Abai oblysynan 424 sportshy Qazaqstan Respýblikasynyń ulttyq quramasyna engen. 2024 jyly oblys sportshylary túrli halyqaralyq jarystarda 114 altyn, 155 kúmis, 211 qola júlde ielendi.
