Abai oblysynda Abaidyń 180 jyldyǵyna arnalǵan mereitoilyq sharalar legi jalǵasýda. Onkúndiktiń segizinshi kúninde Semei qalasyndaǵy Abai atyndaǵy teatrda «Adamzattyń Abaiy» atty respýblikalyq aqyndar aitysy uiymdastyryldy,- dep habarlaidy Dalanews.kz
Óner dodasyna elimizdiń ár óńirinen kelgen on eki aitysker aqyn qatysyp jatyr. Olardyń qatarynda «Aitystyń aqtańgeri» Aibek Qaliev, Maqsat Aqanov, Muhtar Niiazov, Rústem Qaiyrtaiuly, Jansaia Mýsina, Aspanbek Shuǵataev, Meiirbek Sultanhan syndy 6 «Altyn dombyra» iegeri bar. Budan bólek Ásem Erejeqyzy, Shuǵaiyp Sezimhan, «Asyl dombyra» iegeri Aibek Jeńisqazin, Serik Qýanǵan, Qýandyq Kenjebekuly, Ómirjan Kópbosynov sekildi aqyndar sóz saiysynyń kórigin qyzdyrýda. Aitys júrgizýshisi – belgili aitysker aqyn, Parlament Májilisiniń depýtaty Amanjol Áltaev. Qazylar alqasynyń tóraǵasy – QR eńbek sińirgen qairatkeri Júrsin Erman. Memleket jáne qoǵam qairatkeri, QR eńbek sińirgen qairatkeri Saýytbek Abdrahmanov, aqyn Tólegen Janǵaliev, Dáýletkerei Kápuly, Serik Qaliev, Qalqaman Sarin, Parlament Májilisiniń depýtattary Rinat Zaiytov, Janarbek Áshimjan, aitysker aqyndar men jyrshy-termeshilerdiń halyqaralyq odaǵynyń Abai oblysy filialynyń tóraǵasy Dáýlet Smetov aitysqa qazylyq etedi.
Respýblikalyq aitystyń ashylý saltanatyna oblys ákimi Berik Ýáli qatysyp, aityskerlerge sáttilik tiledi.
«Abai qazaq renessansynyń, iaǵni, qaita órleýiniń basynda turǵan qazaq. Sol renessanstyń sharyqtaý shegi – alash qairatkerleri. Abai eli, Semei jeri – tuńǵyshtar mekeni. Qazaq dalasyndaǵy tuńǵysh teatr, tuńǵysh baspa, tuńǵysh fýtbol klýby, tuńǵysh telegraf, tuńǵysh bank, tuńǵysh tsirk Semei jerinde dúniege keldi. Qazaqtyń tuńǵysh kásibi ánshisi Ámire Qashaýbaev Semei topyraǵynan túlegen. Qazaq jazba ádebietiniń negizin qalaǵan Abaidy da tuńǵysh deýge tolyq qaqymyz bar. Sondyqtan tuńǵyshtar jerine qosh keldińizder. Bul jolǵy aitys burynǵy aitystardan ózgerek. Olai deitinimiz, myqty aqyndardyń barlyǵy ortamyzdan tabylyp otyr. Aldaryńyzda turǵan 12 aqynnyń altaýy «Altyn dombyra» iegeri. «Aitystyń aqtańgeri» Aibek Qaliev te ortamyzda. Mundai aitys Semei jerinde kópten beri ótken joq. Búgingi sóz dodasynda aqyndar eldi birlikke shaqyryp, salmaqty, saliqaly sóz aitady dep senemiz. Abai toiy qutty bolsyn!», - dedi aimaq basshysy.
Aitys barysynda «Mádeniet salasynyń úzdigi» tósbelgisi tabystalyp, óńirdiń birneshe aqyny aitysker aqyndar men jyrshy-termeshilerdiń halyqaralyq odaǵynyń músheligine qabyldandy.
Aita keteiik, qala turǵyndary aitysty emin-erkin tamashalaýy úshin Abai teatrynyń aldyna led-ekran qoiylǵan.
