Bar bolǵan jaǵdaida 50 teńgelik betperdeniń quny qazir 250-300 teńge kóleminde sharyqtap ketkenin áleýmettik jelilerde jarysa jazýda.
Osy rette búgingi kúni tapshy dúnieniń ornyn toltyrý úshin Semeide táýligine 100 myń, birneshe márte qoldanýǵa keletin meditsinalyq maska shyǵaryla bastady.
Qaladaǵy tigin kásiporyndarynda bolǵan ShQO ákimi betperde tigýge shikizatpen qiyndyq joq dedi.
Kóprettik betperde shyǵarý Semeidiń jeńilónerkásiptik kásiporyndaryna júktelip otyr. Oblystyń taǵy 10 kásiporynymen kelisimshart jasalynǵan.
Olardyń barlyǵy birinshi kezekte osyndai quraldardy óndirmek.
Solardyń biri – «Semeispetssnab». Búginnen bastap, atalmysh kompaniia táýlik boiy jumys isteitin bolady.
Birneshe qabat matadan tigilgen maskalar jýýǵa yńǵaily. Kásiporynnyń ónimimen tanysqan oblys ákimi Danial Ahmetov ónim sapasyn oń baǵalady.
Aimaq basshysynyń aitýynsha, Shyǵys Qazaqstan táýligine kem degende 100 myńnan astam kóprettik betperde shyǵarýdy josparlap otyr. Osylaisha, 15 kún ishinde qajetti qaýipsizdik quralymen búkil oblysty qamtamasyz etý josparlanýda.
Tigin kásiporyndary jetekshileriniń pikirinshe, Semei qalasy qoiylǵan talapty oryndaýǵa ázir. Iaǵni, eki apta ishinde olar halyqtyń betperdege degen suranysyn qanaǵattandyrmaq niette.
Shikizatty tolyqtai ózderi óndiretin «ÝK Iýnis» JShS basshysy «10-15 kún ishinde óńir turǵyndarynyń suranysyn tolyǵymen qamtamasyz etemiz» deidi Iýrii Kelentsev.
Kásiporyn direktory semeilik ónimniń importtyq taýarlardan áldeqaida jaqsy ekendigine senimdi. Sonymen qatar betperdeni alańsyz qoldaný úshin, arnaiy zerthanalyq zertteýler júrgizilgen.
Endi kóprettik betperdelerdiń 100 myń danasy biýdjettik mekemelerge taratylady. Iaǵni, birinshi kezekte dárigerlerge, politsiia qyzmetkerlerine, Ulttyq Ulan qyzmetkerlerine, tárbieshiler men ustazdarǵa berilmek. Dárihanalarda olar qatań bekitilgen baǵa boiynsha saýdalanbaq.
Baǵlan QALYBAEV
