بار بولعان جاعدايدا 50 تەڭگەلىك بەتپەردەنىڭ قۇنى ءقازىر 250-300 تەڭگە كولەمىندە شارىقتاپ كەتكەنىن الەۋمەتتىك جەلىلەردە جارىسا جازۋدا.
وسى رەتتە بۇگىنگى كۇنى تاپشى دۇنيەنىڭ ورنىن تولتىرۋ ءۇشىن سەمەيدە تاۋلىگىنە 100 مىڭ، بىرنەشە مارتە قولدانۋعا كەلەتىن مەديسينالىق ماسكا شىعارىلا باستادى.
قالاداعى تىگىن كاسىپورىندارىندا بولعان شقو اكىمى بەتپەردە تىگۋگە شيكىزاتپەن قيىندىق جوق دەدى.
كوپرەتتىك بەتپەردە شىعارۋ سەمەيدىڭ جەڭىلونەركاسىپتىك كاسىپورىندارىنا جۇكتەلىپ وتىر. وبلىستىڭ تاعى 10 كاسىپورىنىمەن كەلىسىمشارت جاسالىنعان.
ولاردىڭ بارلىعى ءبىرىنشى كەزەكتە وسىنداي قۇرالداردى وندىرمەك.
سولاردىڭ ءبىرى – «سەمەيسپەسسناب». بۇگىننەن باستاپ، اتالمىش كومپانيا تاۋلىك بويى جۇمىس ىستەيتىن بولادى.
بىرنەشە قابات ماتادان تىگىلگەن ماسكالار جۋۋعا ىڭعايلى. كاسىپورىننىڭ ونىمىمەن تانىسقان وبلىس اكىمى دانيال احمەتوۆ ءونىم ساپاسىن وڭ باعالادى.
ايماق باسشىسىنىڭ ايتۋىنشا، شىعىس قازاقستان تاۋلىگىنە كەم دەگەندە 100 مىڭنان استام كوپرەتتىك بەتپەردە شىعارۋدى جوسپارلاپ وتىر. وسىلايشا، 15 كۇن ىشىندە قاجەتتى قاۋىپسىزدىك قۇرالىمەن بۇكىل وبلىستى قامتاماسىز ەتۋ جوسپارلانۋدا.
تىگىن كاسىپورىندارى جەتەكشىلەرىنىڭ پىكىرىنشە، سەمەي قالاسى قويىلعان تالاپتى ورىنداۋعا ءازىر. ياعني، ەكى اپتا ىشىندە ولار حالىقتىڭ بەتپەردەگە دەگەن سۇرانىسىن قاناعاتتاندىرماق نيەتتە.
شيكىزاتتى تولىقتاي وزدەرى وندىرەتىن «ۋك يۋنيس» ج ش س باسشىسى «10-15 كۇن ىشىندە ءوڭىر تۇرعىندارىنىڭ سۇرانىسىن تولىعىمەن قامتاماسىز ەتەمىز» دەيدى يۋريي كەلەنسيەۆ.
كاسىپورىن ديرەكتورى سەمەيلىك ءونىمنىڭ يمپورتتىق تاۋارلاردان الدەقايدا جاقسى ەكەندىگىنە سەنىمدى. سونىمەن قاتار بەتپەردەنى الاڭسىز قولدانۋ ءۇشىن، ارنايى زەرتحانالىق زەرتتەۋلەر جۇرگىزىلگەن.
ەندى كوپرەتتىك بەتپەردەلەردىڭ 100 مىڭ داناسى بيۋدجەتتىك مەكەمەلەرگە تاراتىلادى. ياعني، ءبىرىنشى كەزەكتە دارىگەرلەرگە، پوليسيا قىزمەتكەرلەرىنە، ۇلتتىق ۇلان قىزمەتكەرلەرىنە، تاربيەشىلەر مەن ۇستازدارعا بەرىلمەك. ءدارىحانالاردا ولار قاتاڭ بەكىتىلگەن باعا بويىنشا ساۋدالانباق.
باعلان قالىبايەۆ
