Semei qalasynyń ákimi Nurbol Nursaǵatov qyzmetinen bosatyldy. Atalǵan laýyzymǵa Besqaraǵai aýdanyn basqarǵan Talǵat Muratov taǵaiyndaldy, dep habarlaidy Dalanews.kz.
Buzyq derkkózi eks-ákimniń qyzmetinen bosatylýyna Semeide bolǵan jaǵdai sebep bolýy múmkin ekenin alǵa tartady.
“Bul sheshim pedagogtardy ortalyq alańdaǵy shyrshany bezendirý jumystaryna zańsyz tartýymen bailanysty bolýy múmkin. Buǵan deiin osy sebeppen qalalyq bilim bóliminiń basshysy da qyzmetinen ketken bolatyn”, — dedi derekkóz.
Alaida Abai oblysy ákimdiginiń baspasóz qyzmeti bul aqparatty teriske shyǵaryp, Nurbol Tólegenulynyń qyzmetten ketýi shyrsha nemese jaraqat alǵan muǵalim oqiǵasymen esh bailanysy joq ekenin málimdedi. Olar bul jaǵdaidyń tek sáikestik ekenin jáne ákimniń jumystan óz erkimen, qyzmet aýystyrýyna bailanysty ketkenin atap ótti.
Aita keteiik, Semeide jańa jyldyq shyrshany bezendirý kezinde aýyr jaraqat alǵan muǵalim áli de aýrýhanada jatyr.
Oqý-aǵartý ministri Ǵani Beisembaev Facebook-tegi paraqshasynda atalǵan oqiǵaǵa bailanysty oblys basshylyǵy ádil ári jan-jaqty tekserý júrgizý kerek ekenin aitqan bolatyn.
"Semei qalasynda muǵalimderdi jańajyldyq shyrshany bezendirýge tartý jáne áriptesimizdiń osy is barysynda jaraqat alýy — zań buzýshylyqtyń aiqyn kórinisi. Pedagogterdi kásibi mindetterine jatpaityn mundai jumystarǵa tartý — «Pedagog mártebesi týraly» zańdy óreskel buzý dep sanaimyn. Bul oqiǵaǵa bailanysty oblys basshylyǵy ádil ári jan-jaqty tekserý júrgizip, aldaǵy ýaqytta mundai keleńsizdikterdiń qaitalanýyna jol bermeý úshin tiisti sharalar qabyldaidy dep úmittenemin", — dep jazdy ol.
Bul oqiǵaǵa májilis depýtaty Ashat Aimaǵambetov te pikir bildirgen edi.
“Pedagog mártebesi týraly” zańnyń 6-babynda muǵalimderdi kásibi mindetterine jatpaityn jumystarǵa tartýǵa qatań tyiym salynǵan. Jańa jyldyq shyrsha ornatý, kóshe tazalaý, basqa da naýqandarǵa májbúrlep qatystyrý siiaqty eski “dástúrlerden” birjola bas tartýymyz kerek. Bul – zańdy óreskel buzý”, – dedi depýtat.
Ashat Aimaǵambetov osy jaǵdaiǵa bailanysty naqty sharalar qabyldaý qajet ekenin alǵa tartty:
1. Oblys basshylyǵy bul oqiǵany muqiiat tergep, jaýapty tulǵalardy jazalaýy tiis.
2. Muǵalimderdi kásibi mindetine jatpaityn jumystarǵa tartýdy toqtatý úshin ministrlik baqylaýdy kúsheitýi qajet.
3. Bilim basqarmalary men mektep ákimshilikteri pedagogtardyń quqyqtaryn qatań saqtaý boiynsha óz mindetterin oryndaýy tiis.
“Memleket basshysy árdaiym muǵalimderdiń mártebesin qorǵaý men olardyń quqyqtaryn saqtaý máselesin erekshe nazarda ustap keledi. Bizdiń mindetimiz – sol talaptardy oryndap, zańnyń jumys isteýin qamtamasyz etý”, – dedi Aimaǵambetov.
