Oblys ákimi Berik Ýáli Semei qalasynda et kombinatyn salýdy josparlap otyrǵan investorlarmen kezdesti. «Eurasia Agro Semey» JShS quryltaishylary aimaq basshysyna jobalaryn tanystyrdy, dep habarlaidy Dalanews.kz
Kásipkerler Jańasemei aýdanynda qýattylyǵy aýysymyna 35 tonna et jáne et ónimderin qaita óńdeýge múmkindik beretin aýqymdy investitsiialyq jobany júzege asyrýdy kózdep otyr. Avstraliianyń zamanaýi tehnologiiasymen jabdyqtalatyn et kombinaty jobasynyń quny 8,4 mlrd teńgeni quraidy. Joba iske asqanda 250 adam turaqty jumyspen qamtylady. Kombinattyń qýattylyǵy aýysymyna 200 bas iri qara mal jáne 1400 bas usaq mal soiýǵa múmkindik beredi. Jylyna 12600 tonna daiyn ónim óndirilip, shet memleketterge eksporttalady. Joba aiasynda 50 myń qoi, 200 bas jylqy jáne 200 bas iri qara malǵa arnalǵan bordaqylaý alańdaryn qurý kózdelýde.
Aimaq basshysy mundai aýqymdy investitsiialyq jobanyń óńir úshin mańyzy zor ekenin atap ótti.
«Abai oblysynda aýyl sharýashylyǵy, onyń ishinde mal sharýashylyǵy ejelden jaqsy damyǵan. Aimaqtyń agrarlyq áleýeti zor. Óńirde mal ósirýmen ainalysatyn kóptegen sharýa qojalyqtary bar. Olar qazirgi tańda ósirgen maldaryn ótkize almai qiyndyq kórip júr. Semeide iri et kombinaty salynsa oblystyń mal sharýashylyǵy salasyna serpin bereri anyq. Ákimdik tarapynan tiisti, barlyq qajetti qoldaýdy kórsetemiz. Sondai-aq, kásiporyndy malmen qamtamasyz etý úshin aýdandarda mal bordaqylaý alańdarynyń sanyn kóbeitemiz. Bul óz kezeginde sharýalarǵa da, et kombinatyna da tiimdi bolady», - dedi oblys ákimi.
«Eurasia Agro Semey» JShS quryltaishylary aǵaiyndy Sailaý, Erlan Muqashevtar kezdesýde qurylysty bastaýǵa daiyn ekenderin jetkizdi. Aimaq basshysy mamyr aiynda kásiporynnyń irgetasyn qalaý sharasyn ótkizýge ýaǵdalasty.
