وبلىس اكىمى بەرىك ءۋالي سەمەي قالاسىندا ەت كومبيناتىن سالۋدى جوسپارلاپ وتىرعان ينۆەستورلارمەن كەزدەستى. «Eurasia Agro Semey» ج ش س قۇرىلتايشىلارى ايماق باسشىسىنا جوبالارىن تانىستىردى، دەپ حابارلايدى Dalanews.kz
كاسىپكەرلەر جاڭاسەمەي اۋدانىندا قۋاتتىلىعى اۋىسىمىنا 35 توننا ەت جانە ەت ونىمدەرىن قايتا وڭدەۋگە مۇمكىندىك بەرەتىن اۋقىمدى ينۆەستيسيالىق جوبانى جۇزەگە اسىرۋدى كوزدەپ وتىر. اۆستراليانىڭ زاماناۋي تەحنولوگياسىمەن جابدىقتالاتىن ەت كومبيناتى جوباسىنىڭ قۇنى 8،4 ملرد تەڭگەنى قۇرايدى. جوبا ىسكە اسقاندا 250 ادام تۇراقتى جۇمىسپەن قامتىلادى. كومبيناتتىڭ قۋاتتىلىعى اۋىسىمىنا 200 باس ءىرى قارا مال جانە 1400 باس ۇساق مال سويۋعا مۇمكىندىك بەرەدى. جىلىنا 12600 توننا دايىن ءونىم ءوندىرىلىپ، شەت مەملەكەتتەرگە ەكسپورتتالادى. جوبا اياسىندا 50 مىڭ قوي، 200 باس جىلقى جانە 200 باس ءىرى قارا مالعا ارنالعان بورداقىلاۋ الاڭدارىن قۇرۋ كوزدەلۋدە.
ايماق باسشىسى مۇنداي اۋقىمدى ينۆەستيسيالىق جوبانىڭ ءوڭىر ءۇشىن ماڭىزى زور ەكەنىن اتاپ ءوتتى.
«اباي وبلىسىندا اۋىل شارۋاشىلىعى، ونىڭ ىشىندە مال شارۋاشىلىعى ەجەلدەن جاقسى دامىعان. ايماقتىڭ اگرارلىق الەۋەتى زور. وڭىردە مال وسىرۋمەن اينالىساتىن كوپتەگەن شارۋا قوجالىقتارى بار. ولار قازىرگى تاڭدا وسىرگەن مالدارىن وتكىزە الماي قيىندىق كورىپ ءجۇر. سەمەيدە ءىرى ەت كومبيناتى سالىنسا وبلىستىڭ مال شارۋاشىلىعى سالاسىنا سەرپىن بەرەرى انىق. اكىمدىك تاراپىنان ءتيىستى، بارلىق قاجەتتى قولداۋدى كورسەتەمىز. سونداي-اق، كاسىپورىندى مالمەن قامتاماسىز ەتۋ ءۇشىن اۋدانداردا مال بورداقىلاۋ الاڭدارىنىڭ سانىن كوبەيتەمىز. بۇل ءوز كەزەگىندە شارۋالارعا دا، ەت كومبيناتىنا دا ءتيىمدى بولادى»، - دەدى وبلىس اكىمى.
«Eurasia Agro Semey» ج ش س قۇرىلتايشىلارى اعايىندى سايلاۋ، ەرلان مۇقاشيەۆتار كەزدەسۋدە قۇرىلىستى باستاۋعا دايىن ەكەندەرىن جەتكىزدى. ايماق باسشىسى مامىر ايىندا كاسىپورىننىڭ ىرگەتاسىن قالاۋ شاراسىن وتكىزۋگە ۋاعدالاستى.
