Súleimenov Semeige qazirden bastap qol ushyn sozbasa, bir kezderi oblys ortalyǵy bolǵan qala ýaqyt óte qańyrap qala ma dep qaýiptenedi.
"Revoliýtsiiaǵa deiin Semei qazaq dalasynyń bas qalasy boldy. Sol kezdegi intelegentsiia ókilderi osy shaharǵa jinaldy. Alyptar týǵan ólke qazaq aqyl-oiynyń ordasy edi. Alashordanyń ókilderi, Semei shaharyn bolashaqta Qazaqstannyń astanasy bolsa eken degen armany bolǵanyn jasyra almaimyz. Alaida ýaqyt óte kele Semei jeri adam sengizsiz qiyndyqtarǵa tap boldy", – deidi aqyn.
Semeidiń búgingi ahýalyna alańdaǵan aqyn qazaqtyń rýhani astanasy 40 jyl boiy iadrolyq synaq alańyna ainalyp, astań-kesteńi shyqqanyna tilge tiek etti. Onyń pikirinshe munyń zardabyn bir sózben aityp jetkizý óte qiyn. Osy zulmatty toqtatý úshin Súleimenov bastaǵan belsendi top "Nevada-Semei" antiiadrolyq qozǵalysyn qurýǵa muryndyq bolǵan.
"Máskeý qalasynda synaqtardyń adam ómirine, qorshaǵan ortaǵa orasan zor zardabyn aita kele, Lev Tolstoi ómir súrgen Iasnaia poliana Orys halqy úshin qandai qymbat bolsa, alyptar dúniege kelgen qazaq úshin de Semei de rýhaniiattyń ordasy ekenin tilge tiek ettim. Mine osyndai jerde iadrolyq qarýdy synaý, poligon jasaý bul ultqa, mádenietimizge, tarihymyzǵa degen qurmetsizdik dep jetkizdim", – deidi Súleimenov.
Aqyn Semeidiń siqy ketip, qatardaǵy aýdan deńgeiine túsip qalǵanyna qynjylys bildirdi.
"Iá, Semei iadrolyq poligony jabylǵanda, qala oblys ortalyǵy bolatyn. Qazir aýdan siiaqty. Bul qandai progress? Eki jyl buryn Semeide boldym. Jaiqalyp turǵan shahardy kórmedim. Halyqtyń kóńil kúii de túsken.
Semei bizdiń rýhani astanamyz emes pe? Qalanyń mańyzdylyǵyn joǵaltpai, qalpyna keltirip, tarihi statýs mártebesin bekitý kerekpiz. Tarihi ádildik ornap, Semeidei shahardyń qadirin bileiik. Kesh qalyp júrmeiik. bolashaǵy jarqyn bolsa eken deimin", – deidi ol.
