Jańasemei aýdanyna qarasty Ozerki aýylynda ýaqytsha qoqys saqtaý poligony 2023 jyly segiz million teńgege salynǵan. Búginde, jergilikti turǵyndardyń aitýynsha, nysan apatty jaǵdaiǵa jetken. Qorshaýdyń bir bóligi qulap, qoqys poligon aýmaǵynan áldeqaida asyp, jan-jaqqa jaiylyp ketken, dep habarlaidy Dalanews.kz.
Orda.kz málimetinshe, belsendiler qurylys pen paidalanýda óreskel buzýshylyqtar bolǵanyn aityp, olar týraly joǵary turǵan organdarǵa birneshe ret shaǵymdanǵan. Tekserý júrgizgen Ishki memlekettik aýdit departamenti 13 million teńgeden astam somaǵa qarjylyq jáne rásimdik zańbuzýshylyqtardy anyqtaǵan. Oǵan merdigerge negizsiz aýdarylǵan qarajat ta kiredi.
Jaǵdaidy kózimen kórý úshin oblystyq qoǵamdyq keńestiń múshesi Rollan Mashpiev oqiǵa ornyna bardy. Ol poligonnyń lyq tolǵanyn jáne qoqys shynymen de shyǵarylmai jatqanyn rastady. Nysan ýaqytsha qaldyq saqtaý úshin salynǵanymen, is júzinde qoqys jinala beretin orynǵa ainalǵan.
«Mundaǵy jergilikti ýaqytsha qoqys alańynyń jai-kúii tańqaldyrady. Qolymda osy nysan boiynsha oryndalǵan jumystardy qabyldaý aktisi bar, iaǵni qatty turmystyq qaldyqtardy ýaqytsha saqtaýǵa arnalǵan alań ornatý jumystary qabyldanǵan. Jazda-aq bári qirap qalǵan. Mundai jumysty qalai qabyldaityny túsiniksiz. Munda Antikor aralasýy kerek», – dep atap ótti belsendi.
Jańasemei aýdanynyń ákimdigi qorshaý kelesi aptada qalpyna keltiriletinin, al anyqtalǵan zańbuzýshylyqtardy joiý jumystary júrip jatqanyn habarlady.
Alaida jergilikti turǵyndar qorshaý jazda-aq búlingenin alǵa tartady. Olardyń paiymdaýynsha, bilik ókilderi onda júrgiziletin jóndeý jumystary týraly tek jaǵdai áleýmettik jelige jariia bolǵannan keiin ǵana aityp otyr. Sonymen qatar sheneýnikter buǵan deiin júrgizilgen aýdit týraly da jaq ashpaǵan.
