Semei qalasynda burynǵy áielin aiaýsyz óltirgen 51 jastaǵy er adamǵa qatysty sot úkimi shyqty, dep habarlaidy dalanews.kz.
Is materialdaryna sáikes, biyl sáýir aiynda mas kúide bolǵan er adam qyzǵanyshtan burynǵy jubaiyna shabýyl jasaǵan. Qaiǵyly oqiǵa áieldiń balalarymen birge turyp jatqan úiiniń aýlasynda bolǵan. Aiyptalýshy jábirlenýshini aǵash beisbol taiaǵymen 27 ret uryp, aýyr jaraqat salǵan. Áiel oqiǵa ornynda kóz jumdy.
Marqumnyń týystarynyń aitýynsha, er adam uzaq ýaqyt boiy áieline qysym kórsetip kelgen. Tipti ajyrasqannan keiin de qyzǵanysh tanytyp, janjal shyǵarýdy toqtatpaǵan.
Sottalýshy sot barysynda óz kinásin tolyq moiyndap, jasaǵan isine ókinetinin aitty.
Sot sheshimimen ol kináli dep tanylyp, 12 jyl merzimge bas bostandyǵynan aiyryldy. Sonymen qatar sot marqumnyń aǵasyna moraldyq shyǵyn retinde 10 million teńge ótemaqy tóleýdi mindettedi.
Týystary shyǵarylǵan úkimmen kelisetinderin málimdedi. Qazir otbasy anasyz qalǵan eki kámeletke tolmaǵan balanyń qamqorlyǵy máselesin sheshýmen ainalysyp jatyr.
