Sekýndyna 240 myń dollar tapqan
80-jyldardyń basynda Taisondy kókke kóterip, aýyr salmaqtaǵy qolǵap sheberleri arasynda oǵan teń keletin tulǵa joqqa tán dep keletin pikirler ústemdik qurǵan edi. Tipti, onyń qarsylasy bar bolǵany birinshi raýndqa ǵana shydas beretin. Osynaý «jyn peri» sondai toǵyz jeńisin nebári bir minýtta ǵana quryqtady.
Bir aita keterligi, onyń kezdesýine asyǵatyn jankúierler qumardan shyǵa almai qalatyn. Árine, júz dollarǵa bilet alyp, ol nebári 30 sekýndqa ǵana sozylsa odan kimge qyzyq? Osyndai «qas-qaǵym sáti» osydan 30 jyl buryn bolǵan edi.
Temir Taison sol joly ataqty aýyr salmaqtaǵy boksshy Djo Freizerdiń uly Marvis Freizerdi 30 sekýndta uryp túsirgen edi. Bul kezde onyń jasy 20-da, salmaǵy 90,5 kg. bolatyn. Onyń kúrzi soqqysynan 2 metrlik alyptar sulap túsip jatty.
Budan keiin T.Berbikbekpen bolǵan jekpe-jek 40 sekýndqa sozyldy. Osydan soń jankúierler baiaǵy Muhammed Álidiń aiyzyńdy qandyratyn keide edáýir uzaqqa sozylatyn ónerin saǵynatyn, eske alatyn boldy.
Munyń syrtynda Taisonnyń tabysy da bas ainalatyndai edi. Qas-qaǵym sát, sekýndtyń ishinde myńdaǵan, milliondaǵan dollar óz-ózinen quiylyp jatty. Máselen, Maikl Spinkspen bolǵan kezdesýinde ol ózindik rekordty jańartty. Ol 91 sekýndqa sozylǵan osy jolǵy básekede álem boksy tarihyndaǵy eń joǵary tabys – 22 million dollarǵa qol jetkizip, dúnieni dúr silkindirdi.
Demek, Maik ár sekýnd saiyn 240 myń dollar tapqan bolyp shyǵady. Árine, Taison da pende, keibir kóńili soqpaǵan sátterde upai sanymen de basym tústi, biraq, mundai jaǵdai onyń ómirinde sirek kezdesetin.
Alaida, Taisonnyń juldyzdy kúnderi uzaqqa barmady. 80-jyldardyń sońynda ol ishimdikke salynyp, politsiiamen ilinisip qalyp júrdi. Keibireýlerdi uryp ketip júrdi, áielimen ajyrasty.
Al 1991 jyly jazda 18 jastaǵy «Amerikanyń qara arýyn» zorlaǵany úshin túrmege tústi. Taǵdyrdyń osy soqqysynan keiin esin jiǵan ol boksqa qaita oralǵanymen, burynǵy qaýqarynan alystap qalǵan edi.
Bul rette E.Holifildpen bolǵan kezdesýdi jurt áli umyta qoimaǵan bolýy kerek. Ábden tityqtaǵan Taison sońǵy raýndqa zorǵa shydas bergen edi. Alaida, Taison bul kezdesý úshin 30 million dollar alyp, al Holifild 5 million dollardy qanaǵat tutqan. Osydan keiin baryp ótken qarymta kezdesý álem boksynyń tarihynda esten shyqpastai bolyp qaldy.
Holifildpen qaita kezdesken Taisonnyń kári jyny qaita qozyp, qulaǵyn julyp alǵany esterińizde bolar. Árine, oǵan eki jyldan keiin litsenziiasyn qaityp bergenimen, ol báribir jaman atymen qaldy. Tipti, ony sporttyń eń qandy degen túrine de jolatpai, bári qashatyn boldy. Milliondaǵan aqshalaryn birneshe márte ótken sot isine jumsady.
Búginde Taisondy sol baiaǵy ataq-dańqy asyrap júr. Óz ómiri jaily kitap shyǵaryp, teleshoý júrgizedi. Tipti, saiasatqa da aralasyp qoiady. Taiaýda ol AQSh prezidenttiginen úmitker Donald Tramptyń kandidatýrasyn qoldaitynyn bildirdi. Tipti, milliarder senator «Maik Taison meni qoldaidy jáne bul maǵan unaidy. Nebir keremet jigitter meniń jaǵymda» dep lepirdi.
Búginde erdiń jasy elýge kelip otyrǵan temir kúrzi iesi ómirinde sátsizdikterge ushyrap, taǵdyrdan qansha taiaq jese de «jylannyń úsh kesse de kesirtkedei qaýqary bar» demekshi, áli de taǵynan túse qoiǵan joq, baiaǵy dańqy ózine endi qyzmet ete bastady.
Derekkózi: «Almaty aqshamy» gazeti
