2025 jyldyń maýsym aiynda Almatynyń Áýezov aýdanynda tórt jańa qoǵamdyq keńistiktiń qurylysy aiaqtalady. Bul týraly Almaty ákimi Erbolat Dosaev Áýezov aýdanynyń turǵyndarymen kezdesý barysynda málimdedi, dep habarlaidy Dalanews.kz
«2025 jyldyń maýsym aiynda 4 qoǵamdyq keńistikti kórkeitý jumystaryn aiaqtaýdy josparlap otyrmyz: Aqsai-4 jáne 12-shaǵyn aýdandaryndaǵy skverler, Mamyr-4 jáne Jetisý-3 shaǵyn aýdandaryndaǵy jaiaý júrginshiler aimaqtary. Bul jobalar aiasynda jańa balalar jáne sport alańdary, kóshe jihazdary, demalysqa arnalǵan kúrkeler ornatylyp, jaryqtandyrý jańartylady jáne jasyl jelekter egiledi», – dedi Almaty ákimi.
Kóriktendirýdiń negizgi jobalarynyń biri – Áýezov aýdanyn da qamtityn Sairan kólin jańartý jumystary.
«2024 jyldyń sońynda negizgi qurylys jumystary aiaqtaldy, al biylǵy mamyr aiynda jobanyń sońǵy kezeńi támamdalady. Sairan kóli qala turǵyndary men qonaqtary úshin eń tartymdy demalys oryndarynyń birine ainalady dep senemin», – dedi Erbolat Dosaev.
Sonymen qatar, Ótegen batyr jáne Jubanov kósheleri «qasbetten qasbetke deiin» qaǵidaty boiynsha kórkeitilip, kógaldandyrylýda. Bul kóshelerde demalys pen sportqa arnalǵan jaily aimaqtar jasalyp, beinebaqylaý kameralary, shamdar, qoqys jáshikteri men balalar oiyn alańdary ornatylady. Sondai-aq, jaiaý júrginshiler men avtoturaq aimaqtary kóriktendiriledi. Jobany 2025 jyldyń qazanyna deiin aiaqtaý josparlanǵan.
