Jylyjai ádisimen jumys jasaityn kásiporyn jylyna 200 tonna qozyquiryq óndirýge qaýqarly.
Sairam aýdanynda egilgen sańyraýqulaqqa Qaraǵandy, Almaty, Astana qalalarynan suranys kóp. Bul jobaǵa seriktestik 572 million teńge jumsapty. Keshende qazir 11 adam jumyspen qamtylǵan.
Sańyraýqulaqtyń «A15» atty sortyn ósirip shyǵaratyn jylyjai kesheni tuqymdy shetelden ákeledi. Kásiporyndaǵy qural-jabdyqtar Polsha men Gollandiia elderinen satyp alynǵan. Fermada kólemi 280 sharshy metr bolatyn 12 kamera bar. Munda egilgen qozyquiryq úsh aida daiyn bolady.
Iaǵni sharýalar jylyna 4 ret ónim alady.
Rashid Seidaliev, tehnolog: – Bir kameradan 10 tonna alynady. 16 kún 25 gradýsta ustaimyz. 16 kúnnen keiin 14 gradýsqa 3 kún ishinde jailap túsiremiz. 14 gradýsta bir juma ustaimyz, sosyn 21-22 gradýs arasynda ustaǵanda ózi ósip shyǵady.
Túrli dárýmenderge bai sańyraýqulaq – qant diabetine de taptyrmas em. Bul qozyquiryq fermasy qazir elimizge kiretin importty almastyrýǵa nietti. Kásiporyn tolyq qýatymen jumysqa qosylǵanda Qazaqstannyń ishki naryǵyn tolyq qamtamasyz etip, artylǵan ónimin shetelge eksporttaýǵa múmkinshiligi bar.
Joba tolyqqandy iske kirisý úshin óńiraralyq investitsiialyq ortalyǵy 30 million teńge qarajat bóldi.
Seriktestik basshysy Aqjol Qońqabaevtyń aitýynsha, kúndelikti 300-500 keli ónim shyǵady. "Tsehtyń ishinde 12 bólme bar. Árbir bólmede 300 sharshy metrden. Sonyń ústine egiledi. Ónimge degen suranys qazirgi tańda Almaty, Shymkent endi-endi úirenip jatyr. Ózderi kelip alyp ketedi", – deidi ol.
Qozyquiryq ósirýde eń alǵashqy iri joba bolyp tabylatyn ferma keler jyly sańyraýqulaqtyń ózge de sorttaryn kóbeitýdi josparlap otyr.
