Sairam aýdanynda memlekettik otbasylyq saiasatty júieli júrgizýge baǵyttalǵan áleýmettik nysandar qatary tolyǵa tústi. Búgin aýdanǵa qarasty Qarasý aýylynda «Sairam aýdandyq jumyspen qamtý jáne áleýmettik baǵdarlamalar bólimi» memlekettik mekemesiniń «Otbasyn qoldaý ortalyǵy» ashyldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Bul kommýnaldyq memlekettik mekeme biylǵy jyldyń shilde aiynda memlekettik tirkeýden ótip, ortalyqta 25 shtattyq birlik bekitilgen. Bir qabatty ǵimaratta ornalasqan mekemede qazirgi tańda 10 kabinet bar.
Jańa áleýmettik nysannyń saltanatty ashylý rásiminde aýdan ákimi Arman Sábitov alǵash sóz alyp, barsha turǵyndarǵa jyly lebizin jetkizdi. Óz sózinde, atalmysh ortalyqtyń atqaratyn jumys baǵyttaryna qysqasha toqtaldy.
Turmys taýqymetine tap bolǵan analardyń qiyn jaǵdailaryn eńserýde, baǵyt-baǵdar berip, qoldaý kórsetýde mundai ortalyqtardyń mańyzdylyǵyn atap, aýdandyq ákeler mektebiniń tóraǵasy, Sairam aýdanynyń Qurmetti azamaty, Seidýaly Temirbaevpen birge ortalyqtyń lentasyn qidy.
Budan soń aýdan ákimi bastaǵan ziialy qaýym ókilderi jańa ǵimarattyń jattyǵý, tamaqtaný jáne jatyn oryndaryn aralady. Múgedektigi bar azamattardy tasymaldaý úshin arnaiy jabdyqtalǵan avtokóliktermen tanysty.
Búginde Jaksybek Ýtegenov basqaratyn atalmysh mekemede kópbalaly, az qamtylǵan, zorlyq-zombylyq kórgen, ómirlik daǵdarys, apatty jaǵdaiǵa tap bolǵan otbasylarǵa neke beriktiligin saqtaý baǵytynda quqyqtyq, psihologiialyq, áleýmettik qyzmet túrleri usynylady.
Aita keteiik, Sairam aýdanynyń ákimi Arman Sábitulynyń qoldaýymen ashylyp otyrǵan bul ortalyqtyń ishinde kásippen ainalysamyn degen turǵyndarǵa qysqamerzimdi tigin, shashtaraz, aspaz sekildi arnaiy kýrstar oqytylady. Sonymen qatar, búldirshinder úshin oiyn bólmeleri bar. Munda psiholog, logoped, sotsiolog mamandar jumys isteidi.
