سايرام اۋدانىندا مەملەكەتتىك وتباسىلىق ساياساتتى جۇيەلى جۇرگىزۋگە باعىتتالعان الەۋمەتتىك نىساندار قاتارى تولىعا ءتۇستى. بۇگىن اۋدانعا قاراستى قاراسۋ اۋىلىندا «سايرام اۋداندىق جۇمىسپەن قامتۋ جانە الەۋمەتتىك باعدارلامالار ءبولىمى» مەملەكەتتىك مەكەمەسىنىڭ «وتباسىن قولداۋ ورتالىعى» اشىلدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
بۇل كوممۋنالدىق مەملەكەتتىك مەكەمە بيىلعى جىلدىڭ شىلدە ايىندا مەملەكەتتىك تىركەۋدەن ءوتىپ، ورتالىقتا 25 شتاتتىق بىرلىك بەكىتىلگەن. ءبىر قاباتتى عيماراتتا ورنالاسقان مەكەمەدە قازىرگى تاڭدا 10 كابينەت بار.
جاڭا الەۋمەتتىك نىساننىڭ سالتاناتتى اشىلۋ راسىمىندە اۋدان اكىمى ارمان ءسابيتوۆ العاش ءسوز الىپ، بارشا تۇرعىندارعا جىلى لەبىزىن جەتكىزدى. ءوز سوزىندە، اتالمىش ورتالىقتىڭ اتقاراتىن جۇمىس باعىتتارىنا قىسقاشا توقتالدى.
تۇرمىس تاۋقىمەتىنە تاپ بولعان انالاردىڭ قيىن جاعدايلارىن ەڭسەرۋدە، باعىت-باعدار بەرىپ، قولداۋ كورسەتۋدە مۇنداي ورتالىقتاردىڭ ماڭىزدىلىعىن اتاپ، اۋداندىق اكەلەر مەكتەبىنىڭ ءتوراعاسى، سايرام اۋدانىنىڭ قۇرمەتتى ازاماتى، سەيدۋالى تەمىربايەۆپەن بىرگە ورتالىقتىڭ لەنتاسىن قيدى.
بۇدان سوڭ اۋدان اكىمى باستاعان زيالى قاۋىم وكىلدەرى جاڭا عيماراتتىڭ جاتتىعۋ، تاماقتانۋ جانە جاتىن ورىندارىن ارالادى. مۇگەدەكتىگى بار ازاماتتاردى تاسىمالداۋ ءۇشىن ارنايى جابدىقتالعان اۆتوكولىكتەرمەن تانىستى.
بۇگىندە جاكسىبەك ۋتەگەنوۆ باسقاراتىن اتالمىش مەكەمەدە كوپبالالى، از قامتىلعان، زورلىق-زومبىلىق كورگەن، ومىرلىك داعدارىس، اپاتتى جاعدايعا تاپ بولعان وتباسىلارعا نەكە بەرىكتىلىگىن ساقتاۋ باعىتىندا قۇقىقتىق، پسيحولوگيالىق، الەۋمەتتىك قىزمەت تۇرلەرى ۇسىنىلادى.
ايتا كەتەيىك، سايرام اۋدانىنىڭ اكىمى ارمان ءسابيت ۇلىنىڭ قولداۋىمەن اشىلىپ وتىرعان بۇل ورتالىقتىڭ ىشىندە كاسىپپەن اينالىسامىن دەگەن تۇرعىندارعا قىسقامەرزىمدى تىگىن، شاشتاراز، اسپاز سەكىلدى ارنايى كۋرستار وقىتىلادى. سونىمەن قاتار، بۇلدىرشىندەر ءۇشىن ويىن بولمەلەرى بار. مۇندا پسيحولوگ، لوگوپەد، سوسيولوگ ماماندار جۇمىس ىستەيدى.
