Saıram aýdandyq “Jastar resýrstyq ortalyǵy” KMM uıymdastyrýymen Qazaqstan máslıhattarynyń 30 jyldyǵyna oraı, bilim men zıatkerlikti damytýǵa arnalǵan oblystyq “Erýdıt” ıntellektýaldy oıyny ótti, dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.
Sharaǵa Saıram aýdany ákiminiń orynbasary Madıar Álipov, Túrkistan oblysy qoǵamdyq damý basqarmasy “Jastar resýrstyq ortalyǵy” KMM basshysy Ernar Bektaev, aýdandyq máslıhat depýtattary qatysyp, qatysýshylarǵa sáttilik tiledi.
Jobanyń maqsaty – jastardyń bilimge qushtarlyǵyn oıatyp, oı-órisin keńeıtý, logıkalyq jáne shyǵarmashylyq qabiletterin damytý, ózara qarym-qatynas pen komandalyq jumystyń mańyzdylyǵyn uǵyndyrý. Intellektýaldy oıynǵa oblys aýmaǵyndaǵy aýdan, qalalardan jáne aýdandaǵy túrli mekemelerden kelgen 15 komanda qatysty. Bes kezeńdik saıysta qatysýshylar tarıh, ádebıet, sport, ulttyq dástúrler, logıkalyq tapsyrmalar sıaqty túrli salalar boıynsha synǵa tústi.
Jarys nátıjesinde Sozaq aýdanynyń “Teriskeı” komandasy jeńimpaz atansa, 2 orynǵa oblystyq “Jastar resýrstyq ortalyǵynyń” “Alash” jáne Keles aýdanynyń “Keles” komandalary jaıǵasty. Al, úzdik úshtikti Saıram aýdanynyń “Báıterek” komandasy qorytyndylady. Sonymen qatar, Saryaǵash aýdanynyń “Konına Power” komandasy “Úzdik talpynys” nomınasıasyn jeńip aldy. Jeńimpazdar men júldegerlerge alǵys hattar men qarjylaı syılyqtar tabystaldy.
