Túrkistan oblysynyń ákimi Darhan Satybaldynyń tóraǵalyǵymen aýdan, qalalardyń damý josparyn talqylap, bekitý jumystary jalǵasýda. Sairam aýdanynyń ákimi Arman Sábitov aýdannyń 2030 jylǵa deiingi damý josparyn baiandady, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jiynda ekonomika, aýyl sharýashylyǵy, kásipkerlik, týrizm salalaryn damytyp, jumyspen qamtý úshin tiisti basqarma basshylarynyń usynystary qaraldy. Oblys ákimi aimaqta óndiris oryndaryn arttyryp, infraqurylym júielerimen qamtýdy, týrizmdi damytýdy tapsyrdy. 
– Aldaǵy jyldarǵa arnalǵan ár aýdan, qalanyń damý strategiiasyndaǵy barlyq jobalalar júzege asyrylýy tiis. Ár aitylǵan ózgertýler men tolyqtyrýlar bekitilip, aýyl-aimaqty damytýdyń tiimdi joldary jumys barysyna alynady. Sairam aýdanynyń áleýetin arttyrý baǵytynda nátijeli jumystar bar. Aýyl eńbekkerleriniń ómir súrý sapasyn jaqsartyp, tabysyn arttyrýǵa baǵyttalǵan jobalalardy kóbeitý kerek, – dedi Darhan Satybaldy.
Biylǵy 9 aidyń qorytyndysymen jalpy óńirlik ónim kólemi 203,1 mlrd.teńgege jetip, ósim 19,2%-dy quraǵan. Basym bóligi aýyl sharýashylyǵy, ónerkásip, saýda, qurylys salalarynyń úlesinde. Biylǵy jyldyń qorytyndysymen jalpy óńirlik ónim kólemin 269,0 mlrd.teńgege jetkizip, 12% ósimdi qamtamasyz etý josparlanǵan. Sońǵy 4 jylda ózindik kirister 2 ese ulǵaiǵan.
Aýdan ákiminiń aitýynsha, negizinen sút, et sharýashylyǵyna mamandanǵan, tamaq ónerkásibi damyǵan aýdandardyń biri jáne kásipkerlik belsendiligi joǵary. Aýdan halqynyń tyǵyz ornalasýyna bailanysty turǵyn úi qurylys úshin berilgen jerlerdiń infraqurylym júielerimen qamtylmaýy, infraqurylym júieleriniń tozýy men elektr qýatynyń tapshylyǵy baiqalady.
Jyl qorytyndysymen 135 mlrd.teńge investitsiia tartý josparlanyp, jeke investitsiia esebinen 2,6 ese ulǵaitý kózdelgen. Aldaǵy 6 jylda quny 1 115,3 mlrd. teńgeni quraityn ónerkásip, aýyl sharýashylyǵy, saýda jáne týrizm salalarynda 100-den astam investitsiialyq joba júzege aspaq. Nátijesinde 7 myńǵa jýyq jumys ornyn qurý boljanýda.
Oblys boiynsha halqy eń tyǵyz ornalasqan Sairam aýdany ekonomikasynyń ósý rezervterin tiimdi paidalaný jáne jańa óndiristerdi iske qosý esebinen ónerkásip ónim kólemin 2030 jylǵa 3,7 esege nemese 205,4 mlrd. teńgege jetkizý josparlanǵan. Iaǵni, jospar boiynsha 6 jylda 635,1 mlrd.teńgeniń ónimi óndirilmek. 2030 jylǵa mal sharýashylyǵy salasynda quny 48,1 mlrd.teńgege 15 jobany iske asyryp, ónim kólemin 188,2 mlrd.teńgege jetkizý boljanyp otyr. 
