Donald Tramp Prezıdent saılaýynan keıin jaqtastarynyń aldynda sóz sóıledi, - dep habarlaıdy Dalanews.kz.
Ol Florıdada sóılegen sózinde saılaýdaǵy jeńisin jarıalady.
"Biz eshkim múmkin emes dep sanaıtyn kedergilerdi jeńdik, eń keremet saıası oqıǵaǵa qol jetkizgenimiz anyq. ...Biraq bul - bizdiń el buryn-sondy kórmegen saıası jeńis", - dedi Tramp.
Ol ekinshi prezıdenttik merzimi el tarıhyndaǵy "naǵyz altyn dáýir" bolatynyn da málimdedi.
"Sizder úshin, sizdiń otbasylaryńyz úshin jáne sizderdiń bolashaqtaryńyz úshin kúresemin. Kúshti, qaýipsiz jáne gúldengen Amerıkany qamtamasyz etpeıinshe toqtamaımyn. Shynymen Amerıkanyń altyn dáýiri bolady. Bul - Amerıkany qaıta uly etýge múmkindik beretin teńdessiz jeńis", - dedi Tramp.
Eske salaıyq, búgin AQSH-taǵy prezıdent saılaýynyń aldyn ala nátıjesi shyqty. Amerıka Qurama Shtattaryndaǵy prezıdent saılaýynyń jeńimpazy - Donald Tramp.
Fox News málimetinshe, Tramp 277 daýys aldy, bul onyń prezıdent saılaýynda jeńiske jetkenin bildiredi.
The Hill basylymy da Donald Tramp saılaýda jeńiske jetkenin málimdedi. Tramp Pensılvanıa men Aláskada da kósh bastaǵan.
Bul derekterdi sońǵy nátıje dep sanaýǵa bolmaıdy, óıtkeni daýys sanaý birneshe kúnge sozylýy múmkin.
Aıta keteıik, buǵan deıin L.N. Gýmılev atyndaǵy Eýrazıa ulttyq ýnıversıteti Saıasattaný kafedrasynyń meńgerýshisi m.a. Janat Momynqulov Dalanews.kz-ke suhbat berip, saılaý nátıjeleri týraly boljam jasady.
"Tramp álemdik saıasatta oıyp turyp oryn alady. Onyń ústine qazirgideı daǵdarys, soǵys jaǵdaıynda onyń is-qımyly - bári óte mańyzdy. Biraq Harrıs qalǵan jaǵdaıda Amerıkanyń osy saıasaty jalǵasa beredi. Qytaıǵa, Reseıge, Iranǵa qatysty shekteý, tejeý saıasaty júredi.
Meniń oıymsha, Harrıstiń jeńisine qýanamyz. Al Tramp keletin bolsa, Reseımen qarym-qatynasyndaǵy ózgerister Ortalyq Azıaǵa, bizge salqyn áser etedi. Bári aınalyp kelgende halyqaralyq júıege áser etedi. Biz boljap bolmaıtyn oqıǵalar bastalyp ketýi múmkin. Harrıs Ortalyq Azıaǵa jańa bir kózqaras tanytýy múmkin, ol - Aq úıdiń mańyndaǵy búrokrattardyń ókili, turaqtylyqtyń "garantıasy". Al Tramp kelse, Ýkraınadaǵy jaǵdaı uzaqqa sozylatyn daýǵa aınalýy múmkin. Sondyqtan, meniń oıymsha, Harrıstiń kelgeni Qazaqstanǵa tıimdi. Ortalyq Azıaǵa tikeleı áseri bolmasa da, sheshimderi arqyly aınalyp kelgende áseri bolady", - dedi ol.
