Qazaqstanda ken óndirý jáne metallýrgiia salalaryndaǵy óndiristik qaýipsizdikti kúsheitý jumystary jalǵasyp jatyr, dep habarlaidy dalanews.kz.
Ónerkásip jáne qurylys ministrliginiń málimetinshe, ministrlik Qaýipsiz eńbek tujyrymdamasy aiasynda kásiporyndarda eńbek qaýipsizdigin qamtamasyz etý baǵytynda júieli sharalar qabyldaýda. Ken óndirý salasyndaǵy ónerkásiptik qaýipsizdik talaptary Jer qoinaýy jáne jer qoinaýyn paidalaný týraly kodekste bekitilgen. Soǵan sáikes árbir jer qoinaýyn paidalanýshy ken óndirý josparyn tótenshe jaǵdailar salasyndaǵy ýákiletti organmen kelisýge mindetti.
Ótken jyly Tótenshe jaǵdailar ministrligimen birlesip ónerkásiptik qaýipsizdik júielerin jańartýǵa investitsiia tartý jospary bekitilip, onyń aiasynda 55 shahta men ken orny tekserilgen.
Tekserý nátijesinde segiz kompaniianyń on óndiristik nysanynda personaldy izdeý jáne pozitsiialaý júieleri joq ekeni anyqtalǵan. Al qalǵan kásiporyndarda ónerkásiptik qaýipsizdik jabdyqtaryn jańartý qajettiligi belgili bolǵan.
Qazirgi ýaqytta atalǵan segiz kompaniianyń óndiristik baǵdarlamalaryn qaita qaraý jumystary júrgizilýde. Úsh kompaniiamen personaldy pozitsiialaý júielerin ornatýǵa investitsiia bólý jóninde kelisim jasalsa, qalǵan bes kompaniia qajetti tehnikalyq sheshimder men jabdyq jetkizýshilerin anyqtap jatyr.
Memleket basshysynyń tapsyrmasyna sáikes metallýrgiia salasynda jańǵyrtýdy qajet etetin 50 iri kásiporyn aiqyndalyp, olardyń jumysyn baqylaý úshin Tehnikalyq qaita jaraqtandyrý baqylaý kartasy ázirlengen.
Sonymen birge jer asty radiobailanysy, personal men tehnikany pozitsiialaý júieleri, avtomattandyrylǵan meditsinalyq baqylaý, jeldetý jáne gaz ortasyn monitoringteý, geomehanikalyq jáne seismikalyq baqylaý, beineanalitika men jasandy intellekt tehnologiialaryn biriktiretin biryńǵai tsifrlyq qaýipsizdik júiesi qalyptastyrylyp jatyr.
Qarmet kompaniiasynyń shahtalarynda da personaldy baqylaý jáne pozitsiialaý júieleri, konveierlerdegi avtomatty órt sóndirý júieleri iske qosylǵan. Rýdnikterde óndiristik protsester tsifrlandyrylyp, karerlerdiń úsh ólshemdi modelderin jasaý úshin ushqyshsyz ushý apparattary qoldanylýda.
«Qaýipti jaǵdailardy avtomatty anyqtaý, qaýipsizdik talaptarynyń saqtalýyn baqylaý jáne táýekelderge jedel áreket etý úshin jasandy intellekt pen beineanalitika tehnologiialary qoldanylyp jatyr», – dep atap ótti ministrlik.
Ministrliktiń málimetinshe, engizilip jatqan tsifrlyq sheshimder óndiristik protsesterdi naqty ýaqyt rejiminde baqylaýǵa, apattar men jaraqattanýdyń aldyn alýǵa, adami faktordyń yqpalyn azaitýǵa jáne táýekelderdi tiimdi basqarýǵa múmkindik beredi.
Ónerkásip jáne qurylys ministrligi aldaǵy ýaqytta da óz quzyretine kiretin barlyq salalarda ónerkásiptik qaýipsizdiktiń zamanaýi standarttaryn kezeń-kezeńimen engizýdi jalǵastyrady.
