«Búgin Taldyqorǵan qalasyndaǵy 71 tergeý abaqtysynda otyrǵan Dákeńmen (Dýman Muhamedkárimmen – red.) kezdesip, kórip shyqtym.
Dákeńniń osy ýaqytqa deiin qoiǵan talaby álgi kúnge deiin oryndalmai kele jatqanyn bilesizder, talaby – Almaty qalasynda ornalasqan 72 mekemege ózin aýystyrý edi, sebebi ata-anasy zeinetker jasta bolǵandyqtan, olardyń kelip-ketýin alańdaidy, ýaiymdaidy.
Osy talaby oryndalmai jatqandyqtan, 19.08.2023 jyly kúndiz saǵat 15:00 shamasynda sol qolyndaǵy besinshi, kishi saýsaǵyn shappaq bolǵan, qapasta eshbir temir zat bolmaǵandyqtan, plastikalyq zatty alyp, saýsaǵyn shappaq bolǵanda plastikalyq zat synyp ketken, nátijesinde saýsaǵy jyrylyp, kógerip, isip ketken.
Kórip, ýaiymdap qaldym, «talabym oryndalmasa, saýsaǵymdy bir kúni shabamyn» dep otyr.
Búginnen bastap 01.09.2023 jylǵa deiin talabym oryndalmasa, 01.09.2023 jyldan bastap ashtyq jariialaitynyn, sodan soń saýsaǵyn shabatynyn málimdedi.
Dákeńniń talaby oryndalýǵa jatatyn talaptardyń biri dep sanaimyn.
Dákeń – óz isiniń naǵyz sheberi, qazirgi tańda Dákeńdei azamat kemde kem, orny qatty bilinip júr», – dep jazdy advokat áleýmettik jelidegi paraqshasynda.
