Jaqynda aýyl ortalyǵynan bazar ashylyp, bir dorba kúnbaǵystyń dánin alyp Ertai atasy ekeýi alǵashqy ret aýyl bazaryna saýda jasaýǵa shyqty. Jurttyń bári túrli zatyn bazarǵa arqalap kelip, saýdalap jatty.
Ádemi jyltyraǵan túrli kámpitter Ertaidyń kózin qaryqtyrdy. Ertai men atasy da shemishke tolǵan dorbasynyń aýzyn ashyp shetkirek bir buryshqa jaiǵasty. Ekeýi bazarǵa shyǵýǵa bet alǵanda ájesi «Shekildeýiktiń staqanyn 100 teńgeden satarsyńdar» dep birneshe ret qaitalap aitqan bolatyn. Olar osylaisha biraz turǵannan keiin bir áiel kelip bir staqan shekildeýik satyp aldy. Biraq áigi áiel:
– Staqandaryńyz kishkentai eken. 100 teńgege alǵash shekildeýigimiz osy ǵana boldy, – dedi jaratpai. Ertai atasyna qarady. Atasy birdeńe búldirip qoiǵandai qipaqtap:
– Úiden alyp shyqqan staqanymyz osy edi. Ertaijan, ápkeńe taǵy bireýin salyp jibershi – dep aqtalǵandai boldy. Budan keiin álgi áiel qaltasyn shekildeýikke toltyryp óz jónimen ketti.
Bir kezde Ertaimen birge oqityn qalqanqulaq Serik kele qalmasy bar ma? Aýyl adamdary bir-birine jaqsy tanys qoi.
– Mynaý álgi Erdenniń nemeresi me? Kel, kele ǵoi, shekildeýik al, – dep atasy bir tiyn almastan onyń eki qaltasyn toltyra shekýildeýik salyp berdi. Seriktiń eki ezýi eki qulaǵyna jetip, máz bolyp kete bardy.
– E, Ertaijan, Erden degen jigittin tóresi edi ǵoi. Qolynda bardy kisiden aiamaityn. Asharshylyq jyldary úiinen talai dám tatyp edik, – dedi atasy. Atasynyń kóńilshektiginen, aýyldaǵylardyń bári tanityndyǵynyń kesirinen túske jetpei-aq dorbanyń túbi kórindi. Ertaidyń qaltasynda bar bolǵany 1000 teńge ǵana tústi. Budan soń, ekeýi úige qaitty. Atasynyń oiynda túk jok, ózinen-ózi máz bolyp kele jatyr.
– Oi, Ertaijan, nesin aitasyń, kópten úiden shyqpap edim! Búgin bir keremet kún boldy. Bazarǵa kúnde keleiik. Shekildeýik sataiyq, – dep qoiady. Eki saýdagerdiń saýda jaiyn estigen apasy:
– Shirkin! Saýdager bolǵandaryńa! – dep sylq-sylq kúldi.
