Áleýmettik jelilerde Almaty – Qorǵas avtojolynda jol jabynynyń aqaýy saldarynan birneshe kólikke zaqym kelgeni týraly video tarady, dep habarlaidy dalanews.kz.
Oqiǵa Baidibek bi aýylyna burylysqa jetpeitin tusta bolǵan. Kýágerlerdiń aitýynsha, beton jabynnyń bir bóligi kóterilip, jol ústinde qaýipti kedergige ainalǵan. Júrgizýshiler ony joǵary jyldamdyqpen baiqamai soǵyp, kólikterine zaqym keltirgen.
Videoda jol jieginde toqtap turǵan birneshe kólik kórsetilgen. Atap aitqanda, Jetour krossoveriniń dóńgelegi jarylyp, diskisi búlingen. Mercedes-Benz G-Class jol talǵamaityn kóliginiń janarmai bagy tesilgen. Al Hyundai jeńil kóliginiń berilis qorabyna beton shyǵyńqysy tiip, maiy jerge aqqan.
Aldyn ala málimet boiynsha, joldaǵy aqaýdyń saldarynan atalǵan ýchaskede shamamen bes kólik qozǵalysyn jalǵastyra almai qalǵan.
Kólik ieleriniń sózinshe, olar «QazAvtoJol» qyzmetkerleri men politsiiany 102 nómiri arqyly shaqyrýǵa tyrysqan. Alaida olardyń aitýynsha, kómek der kezinde kelmegen. Sondai-aq júrgizýshiler joldan ótip bara jatqan eki patrýldik kóliktiń toqtap, kómek kórsetýden bas tartqanyn málimdedi.
Osyǵan bailanysty júrgizýshiler Almaty – Qorǵas baǵytymen júretin azamattardy atalǵan ýchaskede barynsha saq bolýǵa shaqyrýda. Ázirge joldaǵy aqaýǵa qatysty jaýapty organdar resmi túsinikteme bergen joq.
