Depýtattyń aitýynsha, Almatynyń áigili baraholka bazarynda saýda jasaityndardyń kóbi qandastar.
«Qaqaǵan qys pen mi qainatar jazda, tań atysy kesh batysy konteinerde otyryp saýda jasaýǵa májbúr jandardy ózin qojaiyn sezingen ekiniń biri kelip tonap jatyr. Bizge joldaǵan myna hatynda Kenjehan bazarynyń saýdagerleri bar máselesin tizip jazǵan. Búginge deiin quzyrly oryndarǵa qansha aryzdansa da kúshtiniń dúmi diirmen tartady demekshi, qanalǵan qarjysyn qaitara almai keledi kópshilik», – deidi depýtat.
Baraholkadaǵy saýdagerlerden depýtattardyń atyna kelgen myna aryzǵa súiensek, sońǵy 10 jylǵa jýyq ýaqytta «Kenjehan» bazarynyń iesi Nazarbaeva Ánipa Ábishqyzy bolǵan delinedi.
Onyń janyndaǵy adamdar bazardaǵy ár saýda ornyn 10 myń AQSh dollaryna satqan. Alaida satý-satyp alý jónindegi kelisimshartty jasamai tek konteinerdiń pasportyn bergen. «Kelisimshart talap etken jandardy «biz bazarǵa máńgi ielik etemiz, ýaiymdamańdar» dep qaitarǵan. Saýdagerlerdiń dereginshe, atalǵan bazarda 1000-ǵa jýyq konteiner bar.
«Qolda bar aryzdaǵy aqparatqa súiensek, 2022 jyldyń 4 sáýirinde «Kenjehan» bazarynyń 100 paiyz úlesi «Mitra «konsalting» JShS men Rozenberg E.M. degen azamatqa ótken. Bul bazar 640 million teńgege satyldy delinedi. Jańadan kelgen bazar qojaiyndary saýdagerlerge «konteinerlerińdi 325 myń teńgeden satyp alyńdar» dep talap qoiǵan. Sonda el 1 orynǵa 2 ret aqsha tólegen. Amalsyz aqshasyn bergen jandarǵa taǵy da satý-satyp alý týraly qujat berilmegen, tek «kelesim» qaǵazy tapsyrylǵan. Aitpaqshy, kelisimdi sol bazardaǵy notarýiste jasaýǵa mindettegen, ol úshin ár saýdager taǵy 43 myń teńgeden tólegen. Ol ol ma, ár konteinerdiń iesinen aiyna 50 500 teńge aqy alynady degen jáne bir tártip shyǵypty. Muny shaǵymdanǵan el aityp otyr. Bul soraqylyq emes pe? «Tólemese konteinerlerdi mórlep, jaýyp tastaidy» dep ashynady jurt», – dedi ol.
Saýdagerlerdiń 3 talaby bar:
1. Bir konteinerge 2 ret aqsha tólegen jurt burynǵy nemese búgingi bazar iesinde aqshany qaitaryp bersin deidi. Bir saýda ornyna eki ret aqsha tóleý aqylǵa syimaidy ǵoi endi.
2. Ai saiyn qosymsha qarjy jinaý men jumys oryndaryn mórlep jaýyp tastaýǵa qatysty áreketterdiń zańdylyǵyn tekserip, shara qoldanylsyn deidi.
3. «Kenjehan» bazaryn Almatydaǵy Memlekettik kirister departamenti teksergen, sonyń nátijelerin Qarjy ministrligi usynsyn.
«Jyl basynda Qazaqstanda 722 bazar tirkelipti. Sonyń bárinde zańdylyq tolyq saqtalyp otyr dep aita almaimyz. Sebebi ol jaqtaǵy saýdagerlerden de aryzdar keledi. Osy depýtattyq saýaldy daiyndaý barysynda Baraholkadaǵy «Rahat jáne «Evraziia» bazaryndaǵy saýdagerler de shaǵymdaryn jetkizdi. Sondyqtan eldegi barlyq bazardaǵy zańdylyqty tekserý kerek dep esepteimin», – dedi depýtat Nartai Sársenǵaliev.
