"Samuryq-Qazyna" qory Qarjy ministrligine qarasty Memlekettik múlik jáne jekeshelendirý komitetinen "Marhit", "Topaz-NS" jáne "Akmolit" syndy úsh kompaniiany satyp alý úshin qosymsha aktsiia shyǵarmaq. Mundai málimet Qazaqstan qor birjasyna (KASE) ulttyq ál-aýqat qorynyń ornalastyrǵan resmi habarlamasynda qamtylǵan. Aitqandai, sóz etilgen úsh kompaniia elimizdiń eks-prezidenti Nursultan Nazarbaevtyń nemere inisi Qairat Satybaldyulyna qatysy bar qurylymdar ekeni belgili, dep jazady Dalanews.kz.
Qujatta kórsetilgendei, aktsionerlerdiń 6 aqpanda qabyldaǵan sheshimine sáikes, "Samuryq-Qazyna" bir qarapaiym aktsiiasyn 491,3 mln teńgege ornalastyrady. Al ony satyp alý quqyǵy – atalǵan qordyń jalǵyz aktsioneri bolyp sanalatyn Memlekettik múlik jáne jekeshelendirý komitetine tiesili. Komitet bul aktsiiany dál sol somaǵa teń "Marhit", "Topaz-NS" pen "Akmolit" kompaniialaryndaǵy 100 paiyz qatysý úlesterin ótkizia berý arqyly óteidi. Olardyń ishinde eń qymbaty – "Akmolit" (390,8 mln teńge). Al "Topaz-NS" 50,4 mlrd teńgege, "Marhit" 50,1 mlrd teńgege baǵalanǵan.
"Akmolittiń" 2023 jylǵy aýditorlyq qarjylyq esebinde úkimettiń osy úsh kompaniiany "Samuryq-Qazynaǵa" berý jónindegi sheshimdi 2022 jyldyń sáýirinde qabyldaǵany jazylǵan. Tamyzda "Samuryq-Qazyna" men onyń enshiles qurylymy "Taý-Ken Samuryq" arasynda memlekettik múlikti senimgerlik basqarý týraly kelisim jasalǵan. Alaida qandai da bir sebeppen bul mámile aiaqsyz qalǵanǵa uqsaidy. Muny Egov.kz portalyndaǵy 2022–2024 jyldary bul kompaniialardyń quryltaishysy áli de Memlekettik múlik jáne jekeshelendirý komiteti bolyp tabylatyndyǵy týraly aqparat dálel. "Taý-Ken Samuryqtyń" saitynda 2023 jyldyń qańtarynda "Marhit", "Topaz-NS" jáne "Akmolitke" ýaqytsha basshy bolyp Muhammedáli Derbisáliev taǵaiyndalǵany kórsetilgen.
"2022 jyldyń kóktemine deiin bul úsh kompaniia Qairat Satybaldyulynyń atymen bailanystyrylyp kelgen. Forbes jýrnaly "Transporttyq servis ortalyǵyna" osy úsh JShS arqyly ielik etedi dep jazǵan. Bul ortalyqty Satybaldyuly Birikken Arab Ámirlikterinde tirkelgen Bridge Capital Investments Limited arqyly baqylap otyrǵan. Atalǵan ofshorlyq kompaniia 2022 jyldyń basyna deiin "Marhit", "Topaz-NS" pen "Akmolittiń" quryltaishysy retinde tanylǵan. Al qazir Bridge Capital saityna kirýge tyrysqanda The Ultima World basqarýshy kompaniiasynyń portalyna top ete túsesiz", dep jazady kursiv.media.
Keiinnen, Antikor Qairat Satybaldyulyn 2022 jylǵy naýryzda tutqyndady. Al sáýirde Bridge Capital "Marhit", "Topaz-NS" pen "Akmolittiń" basty kapitalyna qatysýdaǵy 100% úlesti memleketke qaitarǵany belgili boldy. Tamyzdyń aiaǵynda memlekettik organdar tergeý aiasynda kúdiktige tiesili zańsyz alynǵan 240 mlrd teńgeden astam qarajat pen aktivterdiń elge qaitarylǵanyn habarlady.
Sol jyly Satybaldyuly senip tapsyrylǵan múlikti ysyrap etý faktisi boiynsha alty jylǵa sottaldy. Ótken jyldyń tamyzynda ol 700 mlrd teńgeniń aktivteri men qarajatyn memleketke ótkizip berdi. Osydan keiin jazany óteý túri ózgertilip, ol bostandyqqa shyqty. Sóitip, memleket menshigine ótken úsh kompaniia endi "Samuryq-Qazynaǵa" ótkeni belgili bolyp otyr.
"Marhit" 2012 jyly qurylǵan. Qyzmet túrleriniń ishinde baǵaly metaldar men sirek kezdesetin metaldar kenderin óndirý de bar. 2023 jyldyń aiaǵyndaǵy shyǵyny 19,9 mln teńgeni quraidy.
"Topaz-NS" 2012 jyldan beri jumys istep keledi. Kompaniia basqa toptarda joq basqa da jeke qyzmetterdi usynady. 2022 jylǵy shyǵyny 3,6 mln teńgeni quraidy.
Buǵan deiin "Samuryq-Qazyna" Boranbaevtyń munai kompaniiasyn tórt ese arzanǵa satyp alǵanyn jazǵanbyz.
