"سامۇرىق-قازىنا" قورى قارجى مينيسترلىگىنە قاراستى مەملەكەتتىك مۇلىك جانە جەكەشەلەندىرۋ كوميتەتىنەن "مارحيت"، "توپاز-نس" جانە "اكموليت" سىندى ءۇش كومپانيانى ساتىپ الۋ ءۇشىن قوسىمشا اكسيا شىعارماق. مۇنداي مالىمەت قازاقستان قور بيرجاسىنا (KASE) ۇلتتىق ءال-اۋقات قورىنىڭ ورنالاستىرعان رەسمي حابارلاماسىندا قامتىلعان. ايتقانداي، ءسوز ەتىلگەن ءۇش كومپانيا ەلىمىزدىڭ ەكس-پرەزيدەنتى نۇرسۇلتان نازاربايەۆتىڭ نەمەرە ءىنىسى قايرات ساتىبالدىۇلىنا قاتىسى بار قۇرىلىمدار ەكەنى بەلگىلى، دەپ جازادى Dalanews.kz.
قۇجاتتا كورسەتىلگەندەي، اكسيونەرلەردىڭ 6 اقپاندا قابىلداعان شەشىمىنە سايكەس، "سامۇرىق-قازىنا" ءبىر قاراپايىم اكسياسىن 491،3 ملن تەڭگەگە ورنالاستىرادى. ال ونى ساتىپ الۋ قۇقىعى – اتالعان قوردىڭ جالعىز اكسيونەرى بولىپ سانالاتىن مەملەكەتتىك مۇلىك جانە جەكەشەلەندىرۋ كوميتەتىنە تيەسىلى. كوميتەت بۇل اكسيانى ءدال سول سوماعا تەڭ "مارحيت"، "توپاز-نس" پەن "اكموليت" كومپانيالارىنداعى 100 پايىز قاتىسۋ ۇلەستەرىن وتكىزىا بەرۋ ارقىلى وتەيدى. ولاردىڭ ىشىندە ەڭ قىمباتى – "اكموليت" (390،8 ملن تەڭگە). ال "توپاز-نس" 50،4 ملرد تەڭگەگە، "مارحيت" 50،1 ملرد تەڭگەگە باعالانعان.
"اكموليتتىڭ" 2023 جىلعى اۋديتورلىق قارجىلىق ەسەبىندە ۇكىمەتتىڭ وسى ءۇش كومپانيانى "سامۇرىق-قازىناعا" بەرۋ جونىندەگى شەشىمدى 2022 جىلدىڭ ساۋىرىندە قابىلداعانى جازىلعان. تامىزدا "سامۇرىق-قازىنا" مەن ونىڭ ەنشىلەس قۇرىلىمى "تاۋ-كەن سامۇرىق" اراسىندا مەملەكەتتىك مۇلىكتى سەنىمگەرلىك باسقارۋ تۋرالى كەلىسىم جاسالعان. الايدا قانداي دا ءبىر سەبەپپەن بۇل مامىلە اياقسىز قالعانعا ۇقسايدى. مۇنى Egov.kz پورتالىنداعى 2022–2024 جىلدارى بۇل كومپانيالاردىڭ قۇرىلتايشىسى ءالى دە مەملەكەتتىك مۇلىك جانە جەكەشەلەندىرۋ كوميتەتى بولىپ تابىلاتىندىعى تۋرالى اقپارات دالەل. "تاۋ-كەن سامۇرىقتىڭ" سايتىندا 2023 جىلدىڭ قاڭتارىندا "مارحيت"، "توپاز-نس" جانە "اكموليتكە" ۋاقىتشا باسشى بولىپ مۇحاممەدالى دەربىسالييەۆ تاعايىندالعانى كورسەتىلگەن.
"2022 جىلدىڭ كوكتەمىنە دەيىن بۇل ءۇش كومپانيا قايرات ساتىبالدى ۇلىنىڭ اتىمەن بايلانىستىرىلىپ كەلگەن. Forbes جۋرنالى "ترانسپورتتىق سەرۆيس ورتالىعىنا" وسى ءۇش ج ش س ارقىلى يەلىك ەتەدى دەپ جازعان. بۇل ورتالىقتى ساتىبالدى ۇلى بىرىككەن اراب امىرلىكتەرىندە تىركەلگەن Bridge Capital Investments Limited ارقىلى باقىلاپ وتىرعان. اتالعان وفشورلىق كومپانيا 2022 جىلدىڭ باسىنا دەيىن "مارحيت"، "توپاز-نس" پەن "اكموليتتىڭ" قۇرىلتايشىسى رەتىندە تانىلعان. ال ءقازىر Bridge Capital سايتىنا كىرۋگە تىرىسقاندا The Ultima World باسقارۋشى كومپانياسىنىڭ پورتالىنا توپ ەتە تۇسەسىز"، دەپ جازادى kursiv.media.
كەيىننەن، انتيكور قايرات ساتىبالدىۇلىن 2022 جىلعى ناۋرىزدا تۇتقىندادى. ال ساۋىردە Bridge Capital "مارحيت"، "توپاز-نس" پەن "اكموليتتىڭ" باستى كاپيتالىنا قاتىسۋداعى 100% ۇلەستى مەملەكەتكە قايتارعانى بەلگىلى بولدى. تامىزدىڭ اياعىندا مەملەكەتتىك ورگاندار تەرگەۋ اياسىندا كۇدىكتىگە تيەسىلى زاڭسىز الىنعان 240 ملرد تەڭگەدەن استام قاراجات پەن اكتيۆتەردىڭ ەلگە قايتارىلعانىن حابارلادى.
سول جىلى ساتىبالدى ۇلى سەنىپ تاپسىرىلعان مۇلىكتى ىسىراپ ەتۋ فاكتىسى بويىنشا التى جىلعا سوتتالدى. وتكەن جىلدىڭ تامىزىندا ول 700 ملرد تەڭگەنىڭ اكتيۆتەرى مەن قاراجاتىن مەملەكەتكە وتكىزىپ بەردى. وسىدان كەيىن جازانى وتەۋ ءتۇرى وزگەرتىلىپ، ول بوستاندىققا شىقتى. ءسويتىپ، مەملەكەت مەنشىگىنە وتكەن ءۇش كومپانيا ەندى "سامۇرىق-قازىناعا" وتكەنى بەلگىلى بولىپ وتىر.
"مارحيت" 2012 جىلى قۇرىلعان. قىزمەت تۇرلەرىنىڭ ىشىندە باعالى مەتالدار مەن سيرەك كەزدەسەتىن مەتالدار كەندەرىن ءوندىرۋ دە بار. 2023 جىلدىڭ اياعىنداعى شىعىنى 19،9 ملن تەڭگەنى قۇرايدى.
"توپاز-نس" 2012 جىلدان بەرى جۇمىس ىستەپ كەلەدى. كومپانيا باسقا توپتاردا جوق باسقا دا جەكە قىزمەتتەردى ۇسىنادى. 2022 جىلعى شىعىنى 3،6 ملن تەڭگەنى قۇرايدى.
بۇعان دەيىن "سامۇرىق-قازىنا" بورانبايەۆتىڭ مۇناي كومپانياسىن ءتورت ەسە ارزانعا ساتىپ العانىن جازعانبىز.
