Búginde nysannyń qurylysy aiaqtalǵan. Endi Sholaqqorǵan aýylyndaǵy «Aqsham» jáne «Naýryz» shaǵynaýdandaryndaǵy 5600 turǵyn, 1111 abonent taza aýyz sýǵa qol jetkizbek. Jańa nysandy kórgen óńir basshysy aýyldar men eldi mekenderdi tolyq aýyz sýmen qamtý baǵytynda jumystar kezeń-kezeńimen júrgizilip jatqanynan toqtaldy.
– Ózderińiz bilesizder, elimizde aýyz sý máselesi ózekti. Oblys turǵyndarynyń 90 paiyzǵa jýyǵy aýyldarda turady. Aýyldar men shaǵyn eldi mekenderde aýyz sý máseleleri kezeń-kezeńimen sheshimin tabýda.
Sozaq aýdanyna jasaǵan alǵashqy saparymda osy Sholaqqorǵan aýylynyń «Aqsham» jáne «Naýryz» shaǵyn aýdandarynyń turǵyndary aýyz sý máselesin kótergen. Bul boiynsha tiisti sharalar atqaryldy. Turǵyndardy ortalyqtandyrylǵan sapaly aýyz sýmen turaqty qamtý úshin qurylys jumystaryn ótken jyly bastadyq.
Bul jumystar aiaqtalyp, jaqyn kúnde Sholaqqorǵan aýyly turǵyndary 24 saǵat sapaly aýyz sýmen qamtylady. Buǵan qosa ótken jyly Qarabulaq, Baldysý, Basbulaq, Sarjaz jáne Syzǵan eldi mekenderin ortalyqtandyrylǵan aýyz sýmen qamtý jumystary bastaldy. Turǵyndar tarapynan kóterilgen árbir másele biz úshin óte mańyzdy, – dedi Darhan Satybaldy.
Darhan Satybaldy Sholaqqorǵan aýylynda ornalasqan Y.Altynsarin atyndaǵy jalpy orta mektebiniń qurylys alańynda bolyp, júrgizilip jatqan jumystardy baqylady. Jaýapty basshylarǵa júktelip otyrǵan mindetterdi jaýapkershilikpen atqarýdy tapsyrdy.
– Memleket basshysy Qasym-Jomart Kemeluly bilim salasynyń jandanýyna erekshe kóńil bólip keledi. Ótken jyly Prezidentimizdiń bastamasymen qolǵa alynǵan «Jaily mektep» ulttyq jobasy aiasynda osynda Y.Altynsarin atyndaǵy 900 oryndyq jalpy orta mektebiniń qurylysyn bastadyq. Jańa mekteptiń tehnikalyq jaraqtandyrý úlesi 4 esege ulǵaitylyp, oqý kabinetteri interaktivti taqtalarmen jáne kompiýterlermen jabdyqtalady. Jaýapty tulǵalardan qurylys sapasyna asa kóńil bólýdi talap etemiz, – dedi oblys basshysy.
«Samuryq-Qazyna» aktsionerlik qoǵamynyń qarjylandyrýymen salynyp jatqan bilim ordasynyń qurylysyn biyl aiaqtaý josparlanýda. Oqý ordasynyń joba quny – 5950,000 mln. teńge. Qurylys jumystaryn «Qarataý LTD» JShS júrgizip jatyr. Bilim uiasy 900 orynǵa laiyqtalǵan.
